「觀光城巴」更新路線 連同新套票帶乘客暢遊港九大嶼山

繼2025年7月31號九巴公布由2025年8月3號正式為旗下穿梭九龍多個景點嘅「HK1觀光巴士路線」加入開篷巴士服務，城巴亦喺2025年8月1號正式公布，隨着城巴旗下「觀光城巴」開篷巴士車隊第20架開篷巴士投入服務，由2025年8月4號開始，城巴更新旗下「觀光城巴」路線，接通更多港九熱門旅遊景點，令乘客可以運用全新套票組合一口氣體驗九龍、香港島以至大嶼山觀光旅程，探索香港自然景觀、文化藝術、海岸秘境嘅獨特魅力。

城巴號稱致力為旅客提供嶄新旅程，故此由2025年8月4號開始，更新旗下3條觀光路線——「H1 懷舊之旅」、「H2 文化之旅」、「H2K 夜賞香港」，新嘅路線以及巴士站會緊貼旅客需求，遊遍香港以及九龍多個景點。 而隨着擴大咗車隊規模，城巴號稱可以喺高峰時段加密班次到最密6分鐘一班車，提升旅客體驗。

路線	途經旅遊景點	行車方向
H1 懷舊之旅	文武廟、大館、皇后像廣場、 銅鑼灣崇光百貨*、灣仔海濱長廊、星光大道	尖沙咀
H1S 藝遊香港	尖沙咀、西九文化區、香港會議展覽中心、 文武廟、大館、中環天星碼頭	中環（天星碼頭） / 西九文化區
H2 文化之旅	九龍清真寺*、栢麗購物大道*、舊油麻地警署*、 旺角、西九文化區、戲曲中心、香港會議展覽中心	中環（天星碼頭）
H2K 夜賞香港	廟街、西九文化區、尖沙咀天星碼頭、麼地道花園*、聖約翰座堂*、 花園道山頂纜車總站*、皇后像廣場、中環天星碼頭	中環（天星碼頭） / 西九文化區
H3 海岸之旅	金紫荊廣場、海洋公園、深水灣、淺水灣、赤柱廣場	赤柱村
H4 海岸之旅	赤柱村、淺水灣、深水灣、海洋公園、香港仔、 山道天橋、堅彌地城新海旁	中環（香港摩天輪）

城巴建議旅客購買「Citybus+日行者觀光套票」——只需港幣198元蚊，就可以喺24小時內無限次乘搭城巴、城巴機場快線以及觀光城巴，憑1張套票，享受3種體驗，照顧旅程每一個細節。

此外，城巴聯同昂坪360喺2025年7月30號公佈攜手合作將開篷巴士同纜車接軌。旅客如果既想喺大嶼山體驗開篷巴士旅程，又想搭下更新路線嘅市區「觀光城巴」開篷巴士，就可以選購「360 大嶼山及市區開篷巴士套票」——只要港幣150蚊就可以享有3趟獨特旅程：套票包括24小時内無限次乘搭「360大嶼山開篷巴士」以及1星期內享用2趟香港島及九龍嘅「觀光城巴」開篷巴士遊。城巴表示以上套票可以畀旅客更便捷穿梭香港各大特色旅遊熱點。