Weisheit 威馳騰純電動雙層巴士運抵香港

Weisheit 呢個德文名稱對香港人而言會感到陌生，但本台早前已經介紹、測試過呢間公司生產嘅 油電混能低地台小巴，有收睇的話應該有所認識。今日，由威馳騰與香港城巴母公司「匯達交通」合作設計生產嘅雙層電動巴士經由深圳皇崗口岸過境至落馬州邊境管制站運抵香港。

巴士前晚由漳州廠房出發，以拖架運至深圳皇崗口岸。完成報關手續後，由深圳海關邊防人員駕駛至香港落馬洲管制站，再由「威馳騰」香港代理嘅人員駕駛，經由吐露港公路、大老山隧道、觀塘繞道、東隧及東區走廊去到柴灣城巴車廠。

據代理方面透露，巴士前晚離開漳州廠房前已完全充滿電，喺深圳皇崗口岸完成報關手續先至開始駕駛，去到柴灣總共行駛48公里，期間「開行」冷氣，巴士耗電量為13%。雖然僅僅係「吉車」，但純以理論推算，廠方宣稱 450kwh 電池 fully-charged 續航距離約200-230km，算係脗合嘅。

外形就見仁見智，但車身骨架材料為不銹鋼，外旁「沙板」並非傳統嘅鋁合金板，而係碳纖維複合物料，聽落都覺得先進，好處當然就係減輕車身重量。機械規格方面採用「輪邊摩打」直接驅動中軸，可算是最大嘅特色，事關呢種佈局即使响歐洲都係近年先至出現，好處係減低驅動過程嘅動力損耗。三車軸嘅懸掛當然係氣墊式。

雖然「威馳騰」來自中國，但「香港國產車始作俑者」嘅 Jacky Lim 响之前節目對於嗰部低地台混能小巴嘅評語都話「算係誠意之作」，而呢部雙層電動巴士嘅「香港研發」成份更多，客觀而言可說是值得留意同期待。

城巴母公司「匯達交通」發出嘅新聞稿表示巴士將進行一連串內部測試，除咗為稍後嘅運輸署驗車之外，亦為正式服務廣大市民做足準備。

Weisheit 威馳騰純電動雙層巴士 規格簡介
型號：WSD6121BR1EV
車身尺寸 (長x闊x高)：11995x2500x4460mm/h 軸距 5640+1500mm
設計負重：前軸8.2噸，中軸13噸，後軸7.5噸，總重 (GVW) 25噸
電池儲電量：450kw/h
驅動形式：輪邊摩打置於中軸兩邊車輪
主迫力：氣壓雙迴路六輪通風碟
設計載客量：79座位 + 30企位

鳴謝：
中國商用汽車有限公司
力豐汽車服務