漳州廈門揸車落深圳雖然好碎料…..

呢幾日有「討論」由漳州揸車落深圳呢個問題，我諗我絕對夠資格講吓呢樣嘢，唔係我囂，歷史事實鐵證如山 that 由2003年我响廈門留低唔少腳毛，往返廈門香港嘅所有方式，除咗「出賣年齡系列」嘅水路之外，HKG 直飛、經 SZX 飛，搭&揸巴士同私家車都試過。高鐵 (動車) 就當然未試過啦，因為大約九年前我「金盤洗手」。

水路？依家唔知係咪已經劏咗嘅「集美號」在經營賭船之前，响1980年代係一艘客輪，隔日由香港或廈門碼頭出發。有返咁上下年紀應該有印象香港嘅颱風消息一定有報「集美船務宣佈往來香港同廈門嘅渡輪服務暫停…..」

講返搭車 or 揸車，其實都唔係幾好受，事關廈門市區-深圳皇崗口岸嘅行車距離大約600km，嗰陣時無「影快相」有幾快揸幾快，私家車淨行車時間起碼六個半鐘，中間埋吓休息站疴下尿食個飯，全程差唔多八個鐘。巴士搭過兩次，一次係「長途班車」安凱 SETRA S215HD，嗰陣漳州-汕頭之間仲未有高速公路，行國道324到汕頭上深汕高速，全程耗時十個鐘。另一次就「跟車」廈門金龍交車落嚟，嗰陣沈海高速啱啱通車，廈門到深圳全程高速公路，心郁郁試吓囉(依家諗返真係攞苦嚟辛)，有一段我揸大膽車 (嗰陣未考大巴牌)。

嗰次坐&揸係由廈門金龍當時响廈門島內枋湖區金湖路廠房出發，原本廠預支俾司機嘅路費係經廈門大橋過集美區直上高速，但司機話「經漳州去上高速時間快一點」(實際係「慳」路費然後自己袋袋平安，雖然只係幾十蚊人仔，都係錢吖) 就照跟住行。

响廈門差唔多六點出發，去到閩粵交界嘅詔安鎮大約八點，搵服務區食飯。食飽就再起行，大約十點過李嘉誠出錢起嘅汕頭大橋，問司機係咪要搵地方過夜，佢話係，通常會係汕尾市鮜門鎮 (深圳公交集團嗰啲車都係佢哋揸落去交車)。去到鮜門接近十二點。架車補油然後人就瞓覺 (地方好嗱喳，依家諗返都覺得好L恐9怖)。

第二朝未夠八點就開車，沿深汕高速繼續直踩。又係「慳路費」唔係直奔機荷高速而係响龍崗落高速再左兜右兜駁到上深圳北環高速過皇崗口岸，到達時間早上11點幾。

淨行車時間大約九個鐘。嗰架 XMQ6885 油缸容量150升，鮜門「補油」時油錶已經「著燈」，到皇崗時亦再次「著燈」。

自此之後我就未有再循陸路往返廈門，都係搭飛機。但每次交車都要上深圳皇崗口岸，有問過廠方司機即使「大車」XMQ6118 油缸300升 (我當年訂嘅香港規格) 要夾硬唔補油都可能得，但佢哋費時孭鑊所以都响鮜門補油約100升。

再另外呢，當年有華閩經營香港至泉州石獅嘅班車，係一車到底，經沙頭角關往來。用車係「西班牙雞」。有印象華閩呢兩架車嘅油缸係加大容量至600升 (一般嘅係450升)。唔駛中途「補油」

走長途車同揸飛機有啲相似，出發前要先做好 route plan，其中一樣必須考慮嘅係續航距離，both 車 & 飛機 嘅 facts 都係燃料缸存量，唔足夠應付全段行程就要計劃好响邊度停車/降落「補油」。例如台灣星宇航空購買 A321Neo 嘅 range 只係4000nmi，但 TLS-TPE 直航距離 6365nmi，所以張國煒 planned land DXB 同 BKK。

依家電動車開始盛行，不論私家車、客貨VAN、貨車、巴士，各製造商都會講 fully charged range 幾遠。而要知路程距離，首先一定要有地理常識同埋識睇地圖，起碼知道漳州大約位置，知道路程有幾遠，再對比返你架Tesla 又好 Smart ForFour Electric Drive 都好，甚至比亞迪 B12A 又好，威馳騰雙層都好，到底夠唔夠行，唔夠嘅要準備去邊度差電，當然要計埋差夠去下一站嘅電量需時幾耐啦。

所以，我到依家仍然唔熱衷電動車，只不過人類總是只看眼前問題，現實中「毛卵計」焗住要睇咁解。不過又咁講，地球石油存量頂盡仲有30-50年，點都要盤算 alternative power 汽車，但電池壽終嘅環保問題，唔該啲環保L唔好再左閃右避喇。

P.S. 點解Cover photo 係年宵市場嘅水鮮花？因為>99% 產地就係漳州囉！
順便提多一樣嘢，天氣開始乾燥，阿伯母煲湯可能會落嘅雪耳，大部份都係產自漳州㗎。記得飲湯之餘食埋啲湯渣，唔好浪費。