客貨車攔腰撞新巴 據悉有5人受傷

2021年10月30號晚11點幾，新巴旗下1架行緊8P號路線去小西灣嘅12.8米版Dennis Trident E500 Turbo型雙層巴士（車隊編號：6188，車輛登記：VE8977），去到銅鑼灣興發街同歌頓道交界遇上車禍。

現場消息指1架沿維園道向歌頓道方向行駛、打算轉上東區走廊嘅客貨車喺去到興發街燈位嗰陣，懷疑現場有車衝紅燈，客貨車直接撞埋去沿興發街行駛嘅雙層巴士嘅左邊車身近上車門位置。

由於事發位置正正位處銅鑼灣消防局門口，當值中嘅消防同救護人員迅即出動，協助事件中嘅傷者。其中客貨車司機一度被困，要由消防員救出，轉交救護員治理。被撞巴士上有大約70名乘客，據報有4名乘客受傷，所幸傷勢並唔嚴重。

受車禍影響，沿興發街上東區走廊嘅交通受阻。