九巴FUN分欺騙我？ 積分系統仲冧咗？

九巴自從2020年10月初推出「九巴龍運FUN分賞」，以「搭九巴儲分換獎賞」吸引乘客，相關優惠獎賞同條款細節亦有變動。嚟到2020年尾，九巴部份「加碼」條款包括：

• 只要之前登記參加「FUN分賞」計劃，再購買或延長九巴月票，即可賺取800分；
• 逢星期一至五早上0600~0659上到九巴嘅巴士用已登記嘅成人、學生、小童八達通卡拍卡，可享雙倍積分優惠；
• 直到2021年2月28號，用已登記嘅成人、學生、小童八達通卡乘搭任何指定九巴營運市區及將軍澳過海線班次，即可享雙倍積優惠；
• FUN分賞會延長到2021年4月30號；
• 積分有效期由積分賺取當日起計 38 日內延長至積分賺取當日起計 45 日內。

不過呢~實際運作上就總會有啲「激氣位」，令一眾乘客感覺到「九巴昆__我！」

其中一個為人詬病嘅就係積分更新，一直有乘客反映「查詢賺分就係睇到8日前，扣分又識即刻show」；同一時間，有唔少乘客都話喺換領獎賞時發現「有唔同款式存貨但唔放貨」。

至於講到計分方法，話就話「搭1蚊車得1分」，而實數可以好好玩…但呢個又唔算係九巴錯嘅 （●＿●）

只不過又咁講，呢個應該真係九巴無得抵賴：

2020年12月31號，一大朝早巴士台已經收到市民反映「無啦啦被九巴扣晒啲分！」…仲收到好幾個市民截圖，顯示積分係「0.0」…

當然，巴士台唔係「4466」，大家係應該搵返九巴嘅…

照睇…係咪伺服器冧機呀？

有乘客就笑言：平時個「APP1933」呀~到站預報呀~都經常出事㗎啦！睇你信佢有bugs定有蠱惑嘅啫！

聽落好似都有道理？