近年香港唔少人都突然好似好鍾意觀賞紅葉，其中元朗大欖郊野公園大棠楓香林尤其多人特意前往，每年11月到翌年1月初嘅時間，正值紅葉季節，經傳媒吹捧後，到訪遊人數量暴增，致使原本港鐵K66號路線巴士、公共小巴元朗←→大棠線不勝負荷。
根據資料，早喺2014年初，港鐵已經因應情況加派巴士疏導人潮，後嚟區議會與及運輸署多番視察討論，當局決定修葺一段大棠山道，令港鐵可以喺2014年11月23號開始，喺觀賞紅葉高峰期加開K66號路線巴士特別班次，由朗屏港鐵站直達大棠山道。
去到2017年，為配合漁農自然護理署慶祝郊野公園成立40周年嘅「大棠．賞玩嘉年華」活動，九巴喺當年12月31號增設68R號巴士路線直接往返形點I同埋大棠山道。
不過，九巴68R號巴士路線總站設喺近保良局大棠渡假村支路，位置較港鐵K66號路線特別班次嘅總站更深入大約300米，而九巴68R號巴士路線必須經警方安排封路，以及巴士公司加派人手去到大棠山道山腳控制車流同埋人流。
2020年12月5號，港鐵K66號路線大棠山道特別班次改設獨立編號：K66A，仲將大棠山道總站搬往渡假村支路，變成由2020年聖誕節開始正式同九巴68R號路線正面「搶客」。
2020年12月26號中午，喺元朗形點I巴士總站可以見到已經有唔少乘客排隊準備乘搭九巴68R號路線，九巴亦一早安排多架巴士接載乘客。
至於大棠山道總站，九巴同港鐵早就派工作人員到場「開壇」，安排到站巴士清客、掉頭、上客。
而港鐵K66A號路線嘅巴士，電子顯示牌除咗路線編號、目的地之外，仲會有「特別服務」、「賞紅葉」、「紅葉專車」等資料方便乘客分辨。
講到埋站，由於大棠山道只係路邊臨時巴士總站，環境狹窄，雙線行車僅僅足夠兩架巴士駛過，站頭等於只有一條車坑畀兩條路線共同，所以九巴同港鐵嘅巴士要因應客量由工作人員利用對講機協調入站。
抵達大棠山道總站清咗客嘅巴士，會被安排去到保良局賽馬會大棠渡假村停車場掉頭，巴士車長亦可以有短暫休息時間。
相對港鐵，九巴為咗吸引更多乘客（講緊巴士迷）乘搭68R號路線，特別安排咗幾架「1哥」同「臨終」嘅巴士行駛，包括AMNE1、AVBML1，以及配有ALX500型車身嘅ATR。
當然，做人最緊要公道：
要表揚嘅，除咗一眾忙於接送遊人嘅巴士業從業員之外，民眾安全服務隊一直都有派人員巡邏，確保遊人喺有需要嘅時候可以提供幫助；另一邊漁農自然護理署嘅人員人數有限，但佢哋面對成千上萬嘅遊人仍然盡忠職守，跑嚟跑去勸阻破壞植披、滋擾動物、亂拋垃圾…嘅遊人，縱使面對犯事遊人粗暴咁同佢哋講「關你乜事」、「係都要咁做呀」、「夠膽就鎖人」，佢哋都無退縮，堅持履行職務(˘•ω•˘)――有無做好份工係人哋睇得到嘅。
只不過，經歷咗一日喺大棠睇見一眾遊客「動物大遷徙」，加上巴士迷「追捕」大棠特別路線嘅巴士…全日最感慨嘅…係呢一個景象…(╯°O°)╯┻━┻
「我哋真係好撚鍾意香港」
香港人：「我哋講吓㗎咋！」ᕕ ( ᐛ ) ᕗ
Be the first to comment