愉景灣中環巴士 朝早都有班次喇！

話說之前講到，愉景灣交通喺2020年8月10號開始，將凌晨嘅來回中環渡輪服務由通宵居民巴士取代：路線編號DB08R。

愉景灣臨時措施？ 出中環通宵巴士！

最初愉景灣交通嘅公佈話，通宵居民巴士會每晚安排2班由愉景灣出中環（0100、0300）、2班由中環返愉景灣（0200、0400），取代原本每晚安排4班渡輪由愉景灣出中環、4班渡輪由中環返愉景灣。 不過好快就因應居民嘅需求，將通宵居民巴士加到每晚有3班由愉景灣出中環（0100、0230、0400）、3班由中環返愉景灣（0200、0330、0500）。

收費方面，用已登記八達通卡畀錢就係成人38蚊、12歲以下小童19蚊，用無登記八達通卡或者現金就係成人52蚊、12歲以下小童26蚊，65歲或以上長者使用八達通卡嘅2蚊搭車優惠同樣適用。

去到2020年9月9號，呢一個臨時嘅通宵居民巴士服務安排有新進展：

根據愉景灣交通嘅乘客通告，由2020年9月10號開始，呢一條居民巴士服務將會喺平日加開2班晨早特別班次：0750、0805單向由愉景灣開往中環。

根據乘客通告所指，今次愉景灣交通加開2班晨早特別班次嘅居民巴士服務，主要原因係在於佢哋近期嘅渡輪服務喺繁忙時段有應急需要，暫時呢個加開嘅班次服務會安排到直至另行通知。

至於收費方面，加開嘅2班晨早特別班次將會較之前嘅凌晨班次為平：用已登記八達通卡畀錢就係成人33.5蚊、12歲以下小童16.8蚊，用無登記八達通卡或者現金就係成人46蚊、12歲以下小童23蚊，65歲或以上長者使用八達通卡嘅2蚊搭車優惠同樣適用。

侬家咁樣「陰啲陰啲」加密來往愉景灣同中環之間嘅居民巴士班次…愉景灣交通嘅「臨時措施」，難免都會令到愉景灣居民懷疑會唔會係「持久臨時」…甚至係喺將來會直接使用居民巴士服務取代渡輪服務――至於會唔會好似當年愉景灣交通聲稱「使用巴士會比渡輪平同環保咗」，大家不妨拭目以待。