自問無本事買「1:1」，唯有買吓啲 1:76、1:120…… 嘅模型 (車仔)，但最新嘅車款只係 MAN 18.310 Berkhof，其餘的都係「老古董」嘅「珍寶」、「長牛」、「大水牛」。近代啲嘅 Olympian, Dragon/Condor, MCW。Benz O305 早在 Drumwell 時已經買齊，嗰陣時邊有話「投機倒把」。可謂 Icon of Hong Kong 嘅勝利二型當然唔少得，又好彩地九記中記冷氣都齊。(1/43？錯成咁，不了。但估計啲錯處响中巴應該無錯得咁離譜，即管「課金」等收貨)
「影巴士」呢門玩意，我細細個就拎住部135菲林傻瓜機、或者拎老豆部 Nikon FE 單反出去影。自從有咗數碼相機之後反而少影，一來無時間，二來睇見「嚟嚟去去都係嗰幾款」，真係呵欠…… 就算影，都只係儲「資料圖片」之用。
互聯網發展迅速，就有人將陳年經典巴士相片 upload 上網，然後就有大把人 Share。早幾年，响 Flickr 嘅 John G. Lidstone、Steven Hodgson, John Soutar and Mark McCann，已經使一班「老鬼」睇到嘩嘩聲，近月再有一位 Mega Anorak，拍攝地點遠至淺水灣、上水總站、荃灣西約、彩雲邨…… 而且有更多前兩位較少見到嘅車款，例如有相當數量的「丹拿C型」(Daimler CVG6 30ft)；更有一張只此兩部單門版「二手丹拿CVG6」的AD7484，簡直勾起我的童年回憶 (出賣年齡? 唓，有乜所謂吖)
唔少人覺得只有「上咗年紀」先至會有「新不如舊」嘅思想，但有一樣真係無可否定，近十幾年嘅新車款，唔係ADL E500 就係 WRIGHT Eclipse Gemini，頂多加少量 Gemilang 嘅 MAN、更「稀有」的 Salvadore Caetano 嘅 Scania，但單單係呢三位「鬼佬」嘅相，車款多到呀…… 就算同一款車，都可以有唔同變化，就以勝利二型為例，睇書講嘅 FS、A、B、C 型，足夠你有排研究。
當今21世紀講求經濟效益，但似乎太集中於錢，忽略咗其他嘢。巴士製造商只圖滿足巴士公司於「錢」嘅需要，係啱嘅，係必要嘅，但唔講個樣萬變不離其中，頭尾燈、頭中尾擔都係嗰啲OEM ，撇下一切個人起好，架車駛過坑渠都 咧咧嘞嘞 響，仲L衰過丹拿F型囉。
Be the first to comment