一場武漢肺炎瘟疫 (生化戰爭) ，令到唔少人關注 (擔心) 巴士密封車窗引伸嘅衛生同安全問題，有巴士公司可能因為咁，「試裝」通風式車窗。但近期 (直至剛過去嘅星期三) 零確診 / 零本地感染，巴士公司可能因為咁就將窗鎖上，變成梗窗。有人認為繼續容許「開窗」會導致容易流失冷氣，同意巴士公司嘅做法，亦當然有持相反意見。開定唔開，或者話鎖定唔鎖，點做好呢？
唔鎖，的確可以讓乘客隨時可以開啟，然後確會容易流失冷氣。但不如諗吓一個問題：小巴大部份係「趟窗」，司機或車主亦無將車窗上鎖，但自從1983年冷氣小巴出現之後，有無見到小巴乘客打開個窗？
無錯，可能因為小巴司機會問候乘客娘親，所以無人敢挑戰小巴佬嘅權威，但實際上有幾多乘客，唔計呢期瘟疫肆虐，响「冷氣開放」嘅時候真係有意欲去打開隻窗？
除咗小巴，仲有一樣交通工具係可以打開車窗 ── 輕鐵車卡。輕鐵嘅通風窗都係無鎖，而且司機身處於獨立駕駛室，唔會一吓子發現有乘客開窗。同樣地，有幾多乘客有意圖或企圖打開隻窗??
似乎擔心有乘客隨時會打開窗而流失冷氣，係有少少多餘。但巴士公司決定「鎖窗」，仲會唔會有其他考慮？
第一，雖然話擔心乘客隨時開窗係多餘，但是於巴士公司嚟講，有咁嘅可能就係可能，必須將之變成「無可能」，咁就完全唔駛擔心「流失冷氣」嘅問題；正如規定因交通意外擠塞司機不能自行改路，先可以完全避免「司機自行改路導致意外或投訴」嘅情況出現。至於塞死咗啲「咸魚」焗住响車上等嘅問題，唔係巴士公司高層等嘛，明冇?!
第二，開得窗，即係可以熄冷氣啦。咁就必定有「環保L」要求熱狗復辟。雖然跟住就係香港人群起而攻之，但點都要花時間應酬吓呢班大帝，寫篇新聞稿都要時間㗎…….
第三，開得窗，可以熄得冷氣，就算唔講乜嘢環保，一定有人嗌「冬天熄冷氣」，然後就必定對幾時熄、幾多度熄……. 拗餐飽。你知啦，香港人熱又投訴凍又投訴，唔 SET 定個日子或者講明溫度，啲投訴CASE 好難拆㗎嘛。
第四，假設真係定好咗熄冷氣嘅規矩，跟住必定有一堆政客 (定係棍？) 衝出嚟大嗌「熄冷氣要減價」「熄冷氣唔減價人血饅頭可恥」……. 然後有報館，又去搵姓盧嗰啲磚家之類話「熄咗冷氣節省咗十萬九千七百蚊燃油開支，所以應該減價」
雖然，假設真係「冬天熄冷氣」但唔減價，全年計算巴士公司節省咗一定比例嘅燃料支出從而能減輕加價壓力，但呢條數有排計，計完之後條街無乜人識睇，就算報館、電視台啲記者、編輯都未必識睇；即使識睇，都未必、或者唔想攞咁多版面攤條數出嚟俾人睇，因為無得再俾版面啲政客 (棍) 同啲磚家繼續鬧嘛。
既然係咁，比著我哋是但一個做巴士公司嘅CEO，都情願俾人鬧「做公關SHOW」都鎖返佢算數。
講白啲，開定唔開、鎖定唔鎖，終極原因根本唔係巴士公司嘅問題，而係來自普羅市民同政客(棍)。如果唔係，當年中巴啲 DA、LA、VA 嘅「英國式車窗」唔駛換晒做梗玻璃啦！
Be the first to comment