越南地鐵未可期 快捷巴士決定起

越南好多人多年嚟依賴自家用嘅單車同埋輕機動車出入，其中喺河內、胡志明市呢啲大城市，面對人口不斷增長，而公共巴士服務卻一直都係慢同埋唔準時，令市民更依賴自家用車，但政府當局又無力擴大市內道路容量，致使路面交通形成困局。

政府當局早就打算興建地下鐵路系統，以減輕路面交通壓力。然而，相關計劃一再推遲，當過去10年胡志明市人口增加咗180萬人，政府擴闊馬路同興建地鐵都唔成事，胡志明市嘅道路就越見擠塞，公共巴士更加慢更加唔準時，更多人寧靜用自家用車，形成惡性循環。

面對呢種情況，越南政府終於行動，決定為胡志明市引入快捷巴士系統：興建公共巴士專用行車線、引入專用電動巴士。

當局期望呢項措施可以避免交通擠塞影響公共巴士嘅速度，加密班次，而電動巴士亦減少路邊空氣污染物。

呢項措施第一階段預計要投資1.37億美元，官方未有透露開支詳情，但外界估計包括購置新巴士、興建新嘅路面、路燈、閉路電視等相關設施、訓練當地管理人員。

有評論指當地政府根本無力支撐整個項目，因此瑞士以及世界銀行都會撥款協助。