【美國亮劍？】新國防授權法案 禁再買中国巴鐵

根據美國華爾街日報喺當地2019年12月9號出版嘅報道，美國國會助理人員向記者透露，美國參議院及眾議院議員打算通過新一輪嘅《2020國防授權法案》。

新法案最明顯嘅一項指令係禁止美國軍方購買中国製造嘅無人機，一眾美國國會議員擔心中国製造嘅呢類設備可能會有「後門」，繞過美國當局保安系統，從而監控美國公眾，並令美國重要基礎設施面臨威脅。

至於另一項喺新法案入面將會獲得通過嘅建議，就係禁止美國各級政府使用聯邦公帑購買中国或中国公司製造嘅巴士同埋鐵路列車。

現時呢兩個範疇入面有兩間中国公司喺美國設立子公司，並且為美國各地提供巴士同埋鐵路列車，其中一間係中国國營鐵路列車大廠中國中車公司（CRRC），另一間係為美國多個城市提供電動巴士嘅比亞迪（BYD）。

市場研究及諮詢機構Prescient ＆ Strategic Intelligence嘅數據顯示，預計美國電動巴士市場規模將由2018年7億4500萬美元攀升至2024年19億5000萬美元；至於鐵路列車方面，估計中國中車公司每年喺美國做緊180億美元生意。

中國中車美國子公司嘅人力資源兼法律總顧問Marina Popovic表示，對美國國會決定為新法案加入呢啲條款感到遺憾；比亞迪美國子公司就並未立即向記者發表意見。呢兩家公司先前曾經指出，加入呢啲禁令條款並唔公平，並且會影響位於加州、麻省、伊利諾伊州工廠嘅美國工人。

美國眾議院軍事委員會備戰小組委員會主席John Garamendi就讚揚加入禁令――佢表示知道好多比亞迪工廠嘅美國工人將會因此失業，但基於美國國家安全同保衛經濟等原因，必須禁止中国巴士同鐵路列車――「好清楚嘅係，中国政府有一連串主導列車同巴士產業嘅策略同戰術計劃，仲已經喺澳洲執行緊，顯然中国亦想喺美國執行」。

根據呢一個建議，現有已經簽署嘅採購合約將唔會受到影響，但當局唔會再批出新嘅採購合約。