【英國巴士】兩巴一車迎頭撞 起碼一死十五傷

英格蘭倫敦東南部奧平頓喺當地時間2019年10月31號晚發生一宗嚴重車禍，涉及兩架單層巴士同另一架房車。

根據網上流傳嘅相片，車禍發生後，涉事房車停喺馬路中間，兩架單層巴士各自剷上兩邊行人路，各車撞碎嘅殘骸散落四周。

倫敦警察廳總部表示大約2215時接到報案，並立即聯同消防及救護人員趕去現場，可惜證實一人當場死亡，另外15人受傷，警方現以涉嫌「危險駕駛引致他人死亡」扣留房車司機協助調查。

據目擊者向《太陽報》憶述，事發時兩架巴士係對向行駛，兩架巴士突然迎頭相撞，然後見到房車喺兩架巴士中間出現。

亦有目擊者話其中一架巴士上有一名乘客被拋出巴士外，當時有一班細路按萬聖節傳統出街「trick or treat」，行人路上有一名路人被巴士撞倒，途人尖叫不絕。

現場傷者已經全部接受治療並送院，救援人員已經撤離，現場交由警方作蒐證。