根據當地一個非政府組織「Campaign for Better Transport」（下稱CBT）引用《資訊自由法》向當局索取到嘅資料顯示，英格蘭各地政府相比10年前，大幅削減對公共巴士嘅資助，引致大批巴士路線要減少班次以至取消。
CBT指相比10年前，現時英格蘭每年整體資助公共巴士服務嘅金額少咗4億鎊，而且英格蘭境內有過半地區政府削資唔少於5成，有10個地區政府直情唔再提供資助。
呢種情況引致倫敦以外嘅英格蘭地區，喺人口有所增長嘅情況下，總巴士乘客人次由2008/09年度嘅24.1億跌到2017/18年度嘅21.3億。
削減公共巴士資助嘅後果亦明顯加劇社會不公，CBT指削資令英格蘭今年削減96條巴士路線，當中近半集中喺諾咸頓郡同打比郡。
CBT嘅行政總監Darren Shirley接受當地傳媒訪問時直言呢個只係「惡性循環」，「削減資助引致非繁忙時間減少班次同時又要加車費，咁樣只係趕客…然後又再減資助、減班、加價…最終受苦嘅只會係低收入家庭、長者、學生」。
當地傳媒追訪運輸部，官員重申佢哋會儘力確保能夠提供「更環保、更方便、更可靠」嘅服務，而且中央政府已經喺9月追加2.2億鎊去改善公共巴士服務。
但代表地方政府協會嘅Darren Rodwell就反駁，中央政府除咗斬件咁掟一細嚿錢出嚟之外，更加要解決公共巴士面對緊嘅「衰落螺旋」：單計英格蘭近半巴士路線淨係提供優惠車費，欠缺嘅資助都已經高達6.52億鎊！
而CBT亦指如果中央政府唔以長期、包攬方式提供資助，英格蘭公共巴士只會進一步流失乘客。
Be the first to comment