為咗方便乘客，香港各間巴士公司都有提供一啲特別班次嘅路線，主要會喺返工或放工嘅繁忙時間提供特快服務。
本台深明好多市民習慣咗一定要搭指定某一個巴士班次，認為自己嘅生活必需要極有規律，所以對於搭唔到嗰一班巴士有時會感覺到非常之沮喪同埋憂慮。
至於任何乘客希望搭到指定嘅巴士班次，一個合適嘅方法就係「早啲去巴士站等」。
說話講就咁講…但現實呢… (―_―)..l..
是咁的，本台今日傍晚經whatsapp群組收到以上照片，據報係1840時，喺中環匯豐銀行總行巴士站有尊貴嘅乘客趕唔切上城巴969B號線巴士，結果嘛…趁著巴士喺行人過路處停燈位就企正巴士車頭唔畀車長開走。 (⊙…⊙)
如果報料人所講嘅事發時間係正確嘅話，其實城巴969B號路線尾車仲未開出――呢位尊貴嘅乘客錯過咗呢一班巴士，只需要喺巴士站繼續等候，咁下一班巴士就可以接載佢去目的地。
依家咁樣貿貿然喺行人過路處攔住一架巴士唔畀車長開走，其實真係贏咗自己道氣，但輸咗大家時間，又唔係關乎啲乜嘢公義上嘅大是大非問題…值得咩？
嗱，巴士唔攔都攔咗、路唔堵都堵咗，一係就畀啲勇氣出嚟講聲「六大訴求 缺一不可」…大家應該都會條氣順啲 (^_^)y
1 Trackback / Pingback