【印度巴士】女性免費巴士飛 改善社會新契機？

印度因種姓制度以及男女不平等而引起嘅社會問題持續多個世紀，令印度女性就學、就業、參與社區活動比率位列世界榜末一方，而近年印度首都新德里多次發生針對女性嘅嚴重暴力及性罪行亦引起國際關注。

當21世紀追求人人平等、免於恐懼嘅生活，新德里首席部長 阿爾溫德．凱傑里瓦爾 計劃先由「搭巴士」改善印度社會文化。

由10月29號開始，當地婦女會得到一款粉紅色嘅巴士飛作為免費乘搭巴士之用，部長先生希望今次嘅措施能夠為印度婦女「充權」踏出歷史性嘅一步。

根據當地政府數據，現時喺印度首都新德里市內搭巴士，車費視乎巴士車型，由5印度盧比到25印度盧比（約港幣4毫到2蚊）。

呢個巴士車費聽落係咪好抵搭呢？

不過法新社嘅記者喺新德里訪問搭巴士嘅婦女就得知「佢哋唔係咁睇」：

• 當地婦女即使係白領，每月收入頂多只係得10,000~15,000印度盧比（約港幣800~1,200蚊）
• 搭巴士開支卻可以高達2,000印度盧比（約港幣160蚊）

所以記者喺當地訪問到嘅婦女都非常歡迎今次部長先生向當地女性派發免費巴士飛嘅措施，認為不但減輕咗在職婦女嘅負擔，同時亦都變相鼓勵家庭主婦更積極參與社區活動。

至於有關婦女乘搭巴士嘅時候，面對暴力及性騷擾嘅罪行，部長先生回應記者提問時指出，現時新德里每日大約有85萬名婦女乘搭巴士，當局會安排13,000名糾察喺巴士上保障佢哋嘅安全。

「羅馬唔係一日之內建成」――單憑派發免費巴士飛同安排糾察上巴士，當然唔能夠將根深蒂固嘅印度社會問題一下子解決，但起碼代表咗呢個政府願意真誠回應公民嘅訴求。

反觀某個「亞洲國際都會」…