【山頂纜車 × Big Bus】慶祝山頂纜車135週年 期間限定維多利亞服飾Big Bus港島遊

如果要講代表香港本土嘅公共交通工具，相信雙層電車、天星小輪之外，山頂纜車都毫無疑問佔咗重要位置，喺過去3年嘅「新型冠狀病毒」（武漢肺炎）疫情期間，香港山頂纜車經歷過第5代車廂萬人擁戴著咁退役，到更換成第6代車廂，最終喺2022年8月底再次迎接乘客，都有唔少香港人緊密關注。

2023年正好係香港山頂纜車通車135週年，作為香港最早嘅鐵道，當然要「搞大佢」——特別同合作多時嘅Big Bus Tours，聯手喺2架開篷巴士貼上咗全車身廣告，成為2023年5~7月期間限定嘅「135周年山頂纜車 x Big Bus 觀光巴士」。

「135周年山頂纜車 x Big Bus 觀光巴士」會喺呢2個月行走港島區嘅Big Bus Tours「紅線」旅遊路線。而為咗進一步「與民同樂 ，全城同歡」咁慶祝山頂纜車服務香港135周年，山頂纜車仲會喺以下日子安排穿著維多利亞時代服飾的表演者上「135周年山頂纜車 x Big Bus 觀光巴士」同乘客互動合照：

• 5 月30 號
• 6月2號
• 6月9號
• 6月16號
• 6月23號
• 6月30號
• 7月1號

有關Big Bus Tours「紅線」旅遊路線嘅詳情，可以參考Big Bus Tours嘅網站。想繼2022年聖誕節嗰陣咁感受穿越時空旅程嘅朋友，就記得要快啲搵Big Bus Tours買飛喇！

巴士台謹此感謝拍攝當日山頂纜車以及Big Bus Tours相關人士協助，尤其對酷熱天氣警告下著起厚重維多利亞服飾仍然滿面笑容嘅演藝人致敬。