2009年4月7號，原本自1974年開始全資擁有香港電車有限公司（香港電車）嘅香港老牌企業九龍倉集團宣佈，將香港電車一半股份以少於1億歐元價錢賣畀法國財團威立雅運輸集團（Veolia Transport，VTRA，威立雅），並且將日常營運工作交由後者負責，以及後者可以行使收購權增加持有股份至100%。
當年隨即引起香港輿論議論紛紛，而威立雅亦公開承諾會致力保存香港電車繼續作為香港文化資產，包括盡量保留電車嘅外觀以及設計等。
然後去到2010年2月17號，九龍倉集團宣佈2010年3月將所持有嘅所有香港電車剩餘股份全部賣畀威立雅，無公佈作價之下，香港電車變為由威立雅全資擁有。
其後因應法國財團之間嘅變動，香港電車喺2010年4月到2020年9月期間由巴黎地鐵交通發展亞洲有限公司 （RATP Dev Transdev Asia (RDTA) ）全資擁有。2020年10月開始，巴黎大眾運輸發展公司（RATP Dev Group）全面收購RDTA，自此全資擁有香港電車。
RATP Dev 由巴黎大眾運輸公司（RATP）全資擁有。RATP 喺巴黎經營嘅公共交通系統是世界上最大多式聯運系統之一。RATP Dev 喺2002年成立，旨在發展 RATP 喺巴黎以外嘅交通系統營運、保養業務。公司喺世界各地經營巴士、電車、火車、地鐵。RATP 連同RATP Dev 累積咗幾十年經營公共交通網絡經驗，期望用專業、知識引領世界各地建立優質公共交通系統。
由 RDTA 到 RATP Dev，法國財團全資擁有香港電車之後，就遇上咗香港動盪嘅10年，即使面對社會運動或者政治抗爭，除咗受限制之下唔能夠抗拒嘅政府相關宣傳廣告之外，香港電車仍然盡量保持政治中立，凡事都集中喺如何保持香港電車能夠有效運作、服務市民——即使面對2014年或者2019年嘅大規模社會運動，香港電車喺法國籍母公司帶領之下，仍然秉持法國格言「自由、平等、博愛」嘅精神，並無鞭撻令到香港電車服務受阻嘅抗爭人士。
而喺呢10年期間，即使面對越嚟越激烈嘅公共交通競爭導致香港電車乘客量大跌，RATP Dev 都帶領香港電車革新服務，喺保留香港電車傳統外觀之下，全面將車隊更新做第7代電車，並且引入新科技提升效率、減少耗電。
香港電車上一任董事總經理魏文（Emmanuel VIVANT）在任期間，香港電車成功研發雙層冷氣電車、引入全新嘅「電車全景遊」、更新公司嘅企業形象標記，致力保留香港電車作為香港文化象徵嘅同時，為香港電車建立與時並進嘅新形象。
2017-05-26 – Emmanuel VIVANT, Managing Director of Hong Kong Tramways 香港電車, was introducing the new logo and visual…
Posted by Chan Ting-kwan on Friday, 26 May 2017
香港電車現任董事總經理敖思灝（Cyril AUBIN）喺2017年8月接任之後，更加致力將香港電車呢個「嘜頭」商業化，香港電車品牌宣傳部喺佢任內同多間企業合作，互相推廣，推出多種聯乘商品，務求大家都從中可以得到宣傳機會：
除咗商業上聯乘合作之外，香港電車喺佢任內亦都肩負企業社會責任，致力參與推廣公益活動，關注多項社會議題：
敖思灝任內，香港電車更加正式榮獲健力士世界紀錄™榮譽，躍身成為「最大的服務中的雙層電車車隊」呢一項世界紀錄認證，無疑更加確認咗香港電車嘅國際地位。
但一間企業並唔係獨立王國，唔能夠話一個董事總經理「做足一世」，時間嚟到2022年7月18號，香港電車發出員工通告，指香港電車會有新任董事總經理。
新任香港電車董事總經理Paul TIRVAUDEY，現年35歲，曾經就讀核能工程師課程，並且擁有項目融資碩士學位。佢曾經效力於法國主要電力公司EDF，其後加入法國環境與能源部嘅碳市場部門。
隨後佢加入法國政府股份公司嘅經濟部擔任投資組合經理，從此開展咗佢喺公共交通運輸業嘅職業生涯，過程中仲參加咗法國國家鐵路公司財務決策等項目。
佢喺2017年加入RATP，擔任集團首席執行官嘅參謀長以及管理委員會嘅秘書。喺過去2年佢仲為RATP作出管理以及應付重大危機，而且佢亦都參加過幾個結構項目，令RATP喺逐步開放巴黎巴士服務嘅競爭做好準備。
根據香港電車嘅員工通告，Paul TIRVAUDEY將會喺2022年10月正式加入香港電車，而喺7月下旬，佢會率先嚟到香港同敖思灝一齊返工5日，準備10月接任。
敖思灝表示，憑Paul TIRVAUDEY嘅能力同埋責任感，對於公司未來發展感到非常放心，因為電車公司喺佢領導之下將會一切順利，為「叮叮」喺歷史寫下更精彩嘅一頁。
Be the first to comment