【香港電車】「電車今日又加價又免費？」 係呀！

2022年7月11號，呢一日本身係香港電車獲准加價到成人每程3蚊嘅生效日，只不過咁，一眾喺港島北乘搭香港電車嘅乘客呢一日又可以享受「免費叮叮乘車日」！

今次活動又係為咗「慶祝香港回歸25周年」，由香港建造商會贊助，揀7月11號嘅原因當然亦同商會嘅行業有關——魯班先師寶誕（魯班誕）。

為咗宣傳呢一次「免費叮叮乘車日」，香港建造商會除咗有印海報之外，仲喺香港電車嘅 #65 電車上面上咗全車身嘅廣告，除咗有「同心同創建新猷 同慶回歸廿五載」嘅口號之外，兩邊車身分別會有港島北黃昏景色以及昂船洲大橋上嘅行車線，顯出建造業對香港嘅重要貢獻。

商會會長林健榮指，魯班誕對建造業嚟講係重要日子，所以揀嚟舉辦「免費叮叮乘車日」，成件事同香港電車喺呢一日加價無關。

林健榮表示，業界希望引入外勞去應付未來北部都會區等大型基建工程，又建議集中外勞喺一個地盤並且興建宿舍，方便佢哋有地方住，從而釋放香港本地人手去其它地盤。

佢認為香港建造業長言需要培訓人手同埋引入更多好似組裝合成法呢啲建築技術，以減低人手成本。

同場主禮嘉賓房屋局局長何永賢就話，興建房屋先至能夠真正解決民生問題，當局要引入科技同資源去壓縮建屋時間，呢方面單靠局方解決唔到問題，要建築界力量先至能夠做到「提速、提量、提效」。

香港建造商會為咗「慶祝香港回歸25周年」，除咗舉辦「免費叮叮乘車日」外，佢哋仲喺灣仔區整咗一個花牌，又去到全香港18區合共派12,000個魯班飯、3,000個福袋。