第六輪抗疫基金 非專營巴士業界表示「公平咩?」

政府今日公佈第六輪抗疫基金撥款預算，呈交立法會財委會審議。上週非專利巴士業界發起慢駛遊行，要求第六輪抗疫基金要全面涵蓋業界各個範疇，包括車主及從業員。計劃公佈之後，業界普遍反應直言有欠公平原則。

第六輪抗疫基金涉及非專營巴士的項目撮要：
– 每輛非專營巴士可獲一筆過 HK$30,000 資助
– 每位校巴司機、保母可獲一筆過 HK$10,000 資助
– 其他「旅遊巴司機」每人可獲一筆過 HK$5,000 資助

在慢駛當日有接受傳媒訪問嘅 康和旅運有限公司 負責人 鄧梅碧霞指出，過境巴士已在第四輪有過三萬元資助，即使撇除今次又再有三萬元資助，已經係對經營本地服務為主嘅公司有欠公允。佢認為疫情對非專營巴士業界造成全面影響，仍然將公司及司機分門別類提供資助嘅做法值得商榷。

本台另外聯絡到兩位不願具名嘅旅遊巴士公司負責人，佢哋不約而同的認為安排有欠公平。

第一位不願透露姓名嘅旅遊巴公司負責人指出三萬元資助「只係好過無」，因為縱使「校車柯打」嘅車輛唔需要開動，但仍然要做一般維修保養，又即使政府有向司機提供資助但仍然要支薪。佢又指村巴服務仍然要維持，但客量因「Work from home」下跌而收入減少，「減班隨時會收 (運輸署) 警告信，唔減班又白燒油」，佢表示唔明白為何燃油補貼向專利巴士公司、公共小巴提供，卻不予「村巴」。

佢另外指出，予司機的資助又再分「校車」與非校車，亦係對佢哋唔公平，「根本上疫情對業界影響係全面性，無理由再分經營類別」。再者，因為公司並非每部車都有 A03 (學校服務) 批註，變相會造成分化

「司機A 個名填上架有 A03 嘅車牌就一萬，司機B 填嘅嗰架車無 A03 就五千，如果伙記發脾氣話我『大細超』唔通要我拎五千銀加埋上一輪嘅六千七合共 $11,700 出嚟『擺平』呀?!」

另一位同樣不願具名嘅旅遊巴公司負責人更直言當局偏袒過境業界，「點解過境車收兩次三萬，我哋只做本地嘅就只係收一次」。佢認為雖然過境客運完全停頓，本地的還有校車、「R仔」(即村巴)、「紅白二事」出租「吊鹽水」，但亦不可能相差一倍 (嘅資助)。

後記：
1. 政府會唔會因應呢啲聲音意見而作出調整，相信大家都唔會有任何期望；
2. 各位讀者/觀眾要明白運輸署嘅權力行使習性有如拎住把尚方寶劍對住業界，所以大多數受訪嘅唔願開名。

各位不妨重溫上週在 HK Bus Channel Youtube頻道 發佈有關非專營巴士業界慢駛遊行報導


睇完記得點擊 訂閱，與及「撳鐘仔」以便可以隨時知道有新影片上架。