聽日開始一連五日（2021年12月1號至5號）喺赤鱲角機場亞洲博覽館舉行嘅「香港國際汽車博覽 IMXHK2021」，可說是香港首次規模盛大嘅室內商業車展。
「汽車博覽」入面，除咗有本港各大汽車代理嘅攤位展出市場上最新嘅各品牌汽車外，仲有唔少改裝車同汽車週邊產品展覽同出售。HK Car Channel 汽車台 YouTube 頻道已上載咗今日傳媒預展所拍攝嘅報導影片。
會場內有一部由私人收藏嘅BACo 車身 Leyland Fleetline 「紅燈籠」古董雙層巴士，大家都可能响過去嘅一啲展覽或公開活動場合見過。場內另一部巴士，應該係全港（甚至係全球）首部 11.7 米 MAN A95 巴士，在「巴士迷」角度可謂相當矚目。
作為低地台雙層巴士底盤 A39 嘅後繼型號，A95 可以話係更符合全球各國雙層城市巴士服務嘅規格。喺 A95 系列下面，除咗最先出現 2.55米闊，12 米長嘅版本之外，其後亦推出更長嘅 12.5 米同 12.8 米兩個長度版本。而喺車身配搭上，除咗裝配喺香港、澳洲同新加坡見慣見熟嘅兩代馬來西亞 Gemilang Lion’s City DD 車身之外，喺南半球嘅紐西蘭仲有配上澳洲 Designline 同 BusTech 車身嘅版本。更有趣嘅係喺呢個南半球國家，仲有用 A95 雙層巴士底盤裝上單層巴士車身嘅特供版本！
但係當其中一個主要對手 Alexander Dennis（ADL）都開始為旗下嘅旗艦級雙層巴士 Enviro 500 推出較短車身型號嘅同時，MAN Truck & Bus SE 亦為新大嶼山巴士提供全球第一部 11.7米版本嘅 A95 雙層低地台巴士。
外觀上，要分辨 11.7 米同 12 米版本嘅分別可能有一啲難度，但係其實只要留意左邊車身前門及中門之間嘅玻璃同窗柱，同埋中門至中軸之間嘅車身旁板，就會見到車身明顯較短。
喺車廂入邊，因應縮短咗嘅車身，座位數目當然係有唔同。先睇下層車廂。
然後就到樓梯及上層車廂
但係呢一部全新嘅 11.7 米 A95 巴士最大嘅賣點，就一定係喺駕駛室嘅電子倒後鏡系統。佢應該係香港境內首部，亦係暫時唯一一部擁有電子倒後鏡嘅巴士。
HK Car Channel 汽車台 YouTube 頻道 之前一集介紹平治 Actros Edition 2 貨車嘅影片節目入面，我哋已經簡單介紹過同類電子倒後鏡系統。
喺英國及歐盟地區，電子倒後鏡系統已經逐漸普及安裝喺貨車同巴士上面。從相片見到，呢部11.7m MAN A95 嘅電子倒後鏡屏幕分別安裝响右邊 A柱，及左邊擋風玻璃近前門開門後嘅止限位置，有別於英國當地因應駕駛室「密封設計」於是將「左鏡」安裝於近擋風玻璃中央嘅位置。
英國嘅司機喺留意左鏡屏幕畫面嘅時候，唔需要好似望向傳統物理鏡面咁望向左邊A柱方向，只需要稍稍向左望就可以望到左邊屏幕。喺駕駛習慣上面，可能視線角度，同埋距離感都需要重新適應。
但全新嘅猛獅 A95 11.7 米巴士將左鏡屏幕擺放於擋風玻璃近左方位置，令一向利用傳統物理鏡面駕駛嘅司機，無需特別適應望鏡方向。而係距離感方面，亦都較為貼近物理鏡面置於A柱外面嘅距離。而無論左右鏡嘅畫面影像，都係依照歐盟 ECE-R46 Class III 同 Class IV 規格要求。
汽車科技永遠都係日新月異，但係香港與汽車規格相關嘅法例嚴重滯後，尤其係規管車身結構同設備嘅法側同，仍然停留喺近四十年前嘅1980年代。早前已經有多部採用電子倒後鏡嘅中、重型貨車喺今年之內陸續出牌，我哋都希望呢部全港首部配有電子睹後鏡嘅公共巴士可以完成 Type Approval 驗車出牌，盡快投入服務。
特別鳴謝： SOUND News 提供本文所有相片。
MAN A95 Facelift 規格簡介：
引擎：MAN D20 水平直列六氣缸渦輪增壓柴油引擎
波箱：ZF 6前速自動波箱
最大馬力：約 360ps
最高扭力：約1,600Nm
制動：電子控制全風式六輪碟式
車身尺寸(約)：11700 x 2550 x 4450mm/h
車身：Gemilang Lion’s City DD Facelift 鋁合金車身
備註：規格資料僅供參考，以車輛生產商及香港代理公報為準。
2 Trackbacks / Pingbacks