城巴遇「停線」唔停 連環撞電單車加郵局

2021年5月5號傍晚大約6點半，警方接報赤柱村道發生涉及巴士嘅車禍。

根據網上流傳嘅「車cam」影片，可以見到事發時1架行緊73號路線嘅城巴丹尼士Enviro 400型雙層巴士（車隊編號：7023，車輛登記：RB8417），去到東頭灣道路口時，未有依從路牌以及地面劃線停低，直接駛出黃麻角道／赤柱村道，隨即直接撞低1架途經嘅電單車。

碰撞後電單車司機倒地，巴士餘勢未了，繼續向前行，直到衝破行人路上路欄同鐵絲網，撼到樹木之後，撞埋赤柱郵政局外牆先至停低。

車禍中電單車司機受輕傷，經救護員初步治理後由救護車送院，警方交通意外調查組派員到場。

至於車禍中另一名「傷者」就係赤柱郵政局，身為「二級歷史建築」，佢係香港現存最古老但仍然一直正常用作郵政用途嘅郵局，正式地址係赤柱黃麻角道2號，喺1937年英皇佐治6世時期建成。香港郵政喺2007年8~11月期間將赤柱郵政局修復返去接近落成時嘅舊貌，例如拆除後加嘅假天花以展示原有嘅橫樑屋頂、鑲有英國皇室（GR字樣）徽章嘅原裝窗花、舊式郵票售賣機、印有英皇佐治6世標記嘅鑄鐵郵箱，而服務櫃台亦回復返懷舊復古設計。

雖然網上有赤柱地區記者表示赤柱郵政局「睇落損毀輕微」，但由事發時嘅影片可以見到，赤柱郵政局主體建築被巴士撞到「成間郁咗」，內部結構可能有待當局勘察先至可以肯定今次損毀有幾嚴重。