九巴龍運FUN分賞 結束時間又延長

九巴同埋龍運為吸引乘客搭多啲巴士，喺2020年10月推出「九巴龍運FUN分賞」活動，乘客利用已經登記嘅八達通卡乘搭九巴同埋龍運旗下嘅專營巴士，可以按巴士車資賺取積分，從而換取獎賞。

九巴連月來有更新計分方法同埋可以換領嘅獎賞，而且亦輾轉將活動結束日期推遲，正當乘客討論緊係咪真係會一如早前公佈咁，儲分日子喺2021年4月30號完結，九巴喺2021年4月16號公佈將日期再推遲2個月，到2021年6月30號。

不過早前嘅星期六、日及公眾假期雙倍積分優惠，會喺2021年4月30號完結。換句話講，由2021年5月1號開始，非「長者或合資格殘疾人士」嘅雙倍積分優惠只係淨返「早鳥」時段呢一項――星期一至五，0600時至0659時，用已登記成人、學生、小童八達通卡或八達通產品，乘搭任何九巴或龍運營運巴士班次，可享雙倍積分優惠，每繳付車資$0.1即可賺取0.2分。

究竟係咪代表九巴啲「精品」已經送出咗八八九九呢？