車長名牌電子化 新、城車長免擺卡

由2020年2月13號凌晨零時開始，新巴同埋城巴旗下嘅巴士車長，喺開工嘅時候毋須再擺放車長名牌卡片。

咁係咪代表乘客想表揚巴士車長都唔知佢係乜水呢？

其實又唔會，因為嗰一刻開始，新巴同埋城巴嘅第二代實時報站系統正式加入車長電子名牌功能，會喺動態顯示屏幕展示巴士車長嘅姓氏同埋員工編號（總之唔會只得個「行動呼號」啦！）

簡單講吓背後個原理：

現時巴士車長都會獲發一張員工個人用嘅八達通開機卡，上到架巴士，準備去服務乘客嘅時候，巴士車長都要用開機卡拍埋巴士嘅八達通收費器去登入系統，呢個時候系統就會知道係乜水揸緊架巴士，並且可以將相關資料反饋畀報站系統顯示。（如果無高級營運主任「搶車」嘅話就全程都會係嗰個車長㗎喇！）

至於做人呢~總有機會掛萬漏一嘅，有朝一日唔記得帶張開機卡又點算？

（收車唔使做啦！）

當然無理由因為咁簡單就出「收車大法」…根據公司指引，首先搵控制中心，得到批准之後就可以借同事嘅開機卡登入，再手動撳返揸車嗰個巴士車長自己嘅員工編號就得㗎喇！

最後要講埋，以上講嘅車長電子名牌功能，只係適用於新巴同埋城巴旗下裝咗動態顯示屏幕嘅巴士，所以城巴非專利部嘅巴士、無打算升級安裝動態顯示屏幕嘅行將退役巴士（講緊新巴 #3355 / #3356）…都係無呢個功能㗎！

至於轉用車長電子名牌之後，原本擺放車長名牌卡片嘅位置會有提醒乘客轉睇屏幕嘅告示遮蓋。