話說巴士台喺2026年初報道過，英國國會就英國巴士製造業嘅現況以及未來展開辯論，重點關注一個日益凸顯嘅矛盾：英國對零排放巴士需求激增，但英國國內產量下跌。
過咗超過半年，英國政府其實都曾經推出過一啲措施，不過呢….睇下巴士製造商嘅意見：2026年10月6號，亞歷山大丹尼士（Alexander Dennis，以下簡稱「ADL」）宣布已就蘇格蘭政府嘅無薪假（furlough）支援計劃嘅部長級聲明作出回應，事關呢個聲明未能完全反映導致ADL喺蘇格蘭製造業務出現變動嘅實際情況。
早喺 2025 年 6 月，ADL 曾經宣布計劃停辦位於蘇格蘭福爾柯克（Falkirk）同埋拿貝特（Larbert）廠房嘅巴士製造業務，以應對需求下跌同埋激烈嘅國際競爭。
隨着蘇格蘭政府宣布額外提供 4000 萬英鎊嘅 ScotZEB2 資助，ADL預期呢筆資助會帶動大量新巴士訂單，ADL 同意實施一項為期 26 星期嘅無薪假計劃，旨在補貼員工薪金，直至預期嘅訂單喺 2026 年投入生產為止。
不過，呢筆額外嘅 ScotZEB2 資助延期最終畀蘇格蘭一班部長取消咗，並且由一項新嘅資助方案 ScotZEB3 取代。呢個做法令原本作為無薪假計劃基礎嘅預期訂單供應鏈出現咗重大變化。
隨着呢個新嘅 ScotZEB3 審批過程中嘅訂單數量越嚟越明確比預期為低，ADL 開始考慮維持蘇格蘭巴士生產可行方案，包括將底盤生產內包（in-sourcing）。呢個新方案已經喺 2026 年 3 月向副首席部長匯報。
當 ScotZEB3 嘅結果喺 2026 年 3 月公布嗰陣，超過一半嘅巴士訂單竟然判畀咗英國之外嘅海外製造商——截至依家，ADL仲未收到任何嚟自 ScotZEB3 嘅新巴士訂單。
ADL 隨後就將業務轉型為只做底盤裝配、作為蘇格蘭製造業務唯一具商業可行性嘅方案展開咗諮詢。由嗰陣時開始，ADL除咗對場地作出重大投資之外，仲投放咗幾百萬英鎊去改造拿貝特廠房——呢筆投資嘅目的係為咗保住技術人才同埋守住蘇格蘭重要嘅製造能力。
ADL表示呢一連串行動證明咗ADL一直心繫蘇格蘭業務嘅長遠發展，ADL強調坊間任何認為ADL有「預謀執笠」嘅推斷都係完全錯誤。
ADL重申為咗保護職位同埋技術所承擔嘅成本，遠遠超過原本提供嘅 410萬英鎊無薪假支援。ADL強調，如果尤如預期中能夠落實蘇格蘭政府支持嘅巴士訂單、廠房亦如無薪假計劃原本嘅構思咁恢復製造巴士車身——呢啲成本根本就唔使攞出嚟。
ADL依家呼籲蘇格蘭同埋英國政府，建立一個長遠嘅巴士訂單供應鏈嚟支持英國本地製造業、技術職位同埋經濟增長。要達成呢個目標，就需要業界上下齊心協力，加上政府政策嘅支持，提供製造商投資所需嘅長遠能見度。只要有足夠嘅需求，ADL 隨時準備好、亦有能力令蘇格蘭嘅製造業務再次壯大。
ADL 總裁兼董事總經理 Paul Davies 表示：「話無薪假計劃失敗係因為 ADL 未能達到協議條件，呢個講法只係講咗故事嘅一部分。喺 2025 年夏天，蘇格蘭政府宣布咗額外嘅 ScotZEB 資助，預期會為 ADL 帶嚟幾百張巴士訂單，並且保住蘇格蘭嘅製造業職位。我哋正正係喺呢個基礎上，先至撤回咗關閉福爾柯克同埋拿貝特廠房嘅計劃，並期望無薪假津貼可以覆蓋受影響員工 80% 嘅人工，直至新巴士訂單落實為止。任何對形勢嘅公平評估都會承認，撤回額外嘅 ScotZEB2 資助造成咗訂單缺口，呢個先至係最終導致我哋將拿貝特廠房改裝做底盤製造廠嘅關鍵。」
佢仲補充講到：「ADL 已經自掏腰包投資咗幾百萬英鎊去保住蘇格蘭嘅職位同埋製造能力。我哋依家喺一個大家都引以為傲嘅先進廠房入面生產緊高質素嘅巴士車身、底盤，而且我哋刻意保留咗喺未來需求支持下重返全車身製造嘅能力。今日，蘇格蘭唯一嘅本地巴士製造商有閒置產能，但蘇格蘭納稅人嘅錢竟然繼續去補貼喺海外建造嘅巴士。如果英國同蘇格蘭政府能夠為本地製造嘅零排放巴士建立一個穩定、長遠嘅訂單供應鏈，ADL 已經準備好進行投資、發展，並且喺呢個地區重新開展巴士車身製造業務。」
Be the first to comment