中華電力首架純電動雙層巴士首次開放畀公眾參觀

中華電力有限公司（中華電力）喺2025年7月2號去到啟德體育園散場特別路線巴士總站舉行公司電動巴士亮相儀式，首度向公眾展示中華電力用以接送發電廠員工嘅純電動雙層巴士。

呢架車輛登記為WE6853嘅中華電力首架純電動雙層巴士喺1510時抵達位於宋皇臺道側邊嘅啟德體育園散場特別路線巴士總站。

呢架純電動雙層巴士到場之後，中華電力率先安排嘉賓登車參觀，體驗一下發電廠員工乘搭穿梭巴士嘅環境。

到咗大約1530時，一眾主禮嘉賓就舉行咗一個簡單嘅剪綵儀式，其後仲以呢一架中華電力嘅純電動雙層巴士以及中華電力喺啟德嘅新總部大樓作為背景拍攝合照。

亮相儀式上，中華電力總裁羅嘉進先生向參與嘅市民介紹公司車隊電動化進程，並且推廣公司引入電動巴士嘅環保效益，以配合政府喺2050年前達致車輛零排放以及實現碳中和嘅目標。

隨着政府逐步淘汰歐盟4期柴油車輛，中華電力車隊中歐盟4期柴油私家巴士喺2025年退役。

中華電力首次引入4架純電動雙層巴士，屬於全香港首批私家電動雙層巴士，中華電力會用呢4架純電動雙層巴士接載員工日常往返發電廠工作。

呢一款雙層電動巴士牌子係ADL，型號係Enviro500EV，配備 472 kWh 電池容量，預計續航距離約200公里。白色車身配以樹葉拉花以及「純電動 零排放」標誌作點綴。

車廂內飾用咗藍色色調—老一輩嘅巴士迷應該會認為呢架根本就係「中華巴士」—加上白色發光二極管照明系統，而車上所有乘客座位都設有佩戴安全帶偵測器。巴士車廂同一般專營公共巴士其中一個分別就係並無設立輪椅位，改為安裝2個向前望嘅獨立座椅，縱使車廂不設企位，仍然最多可接載超過100名員工。

中華電力表示，呢一款雙層電動巴士完成檢驗以及測試程序後，會喺2025年7月內陸續投入服務。

中華電力總裁羅嘉進先生表示：「交通運輸電動化有助減少碳排放，係實現碳中和嘅重要一環。中華電力喺電動車生態圈擔當推動者角色，一直發揮電能專業，為電動車使用者提供可靠便利嘅充電設施以及相關嘅技術支援服務。我哋同時身體力行，致力將公司車隊電動化，截至今（2025）年 4 月底，中電嘅小型車種（即：房車 Saloon 以及 休旅車 SUV）超過8成已轉用電動車，亦會聯同業界繼續進一步推動巴士等商用電動車市場發展。」

中華電力表示將繼續密切留意電動車市場發展，並且根據車隊實際應會用情況以及業務需求，擴充應用電動車，全力支持以及配合香港實現碳中和嘅願景。

中華電力呢次預早宣傳佢哋會公開展示首架雙層電動巴士，吸引到一批巴士迷到場，中華電力為咗感謝一班巴士迷支持呢個活動，特別準備咗一批證書同埋貼紙派畀在場嘅巴士迷。

如果攞唔到實體版嘅證書…唔需要擔心！！！！

因為有電子版呀！

中華電力職員派發完證書同貼紙呢啲紀念品之後，就安排在場嘅一眾巴士迷分批登相呢一架中華電力嘅純電動雙層巴士參觀，現場秩序大致良好，未有出現近來上晒電視嘅「動物園」情況。

隨著一眾嘉賓、在場協助活動進行嘅中華電力員工齊齊以呢一架中華電力純電動雙層巴士以及中華電力新總部作為背景拍攝大合照之後，呢一次活動亦都完滿結束。

中華電力呢一架純電動雙層巴士最後喺大約1630時經土瓜灣道離開，返回發電廠準備接載員工收工。