【日本】北海道機場巴士起火 司機：乘客、行李都要救！

當地時間2025年12月17號1140時左右，一名目擊者報案指喺日本北海道道央自動車道惠庭交流道以及千歲交流道之間，有一架巴士起火。

當地警方以及消防局出動咗多架消防車以及其他緊急車輛，消防員用咗大約一個半小時​​將火勢完全撲滅，起火巴士被焚燒到骨架外露。

因應呢次火燒機場巴士事件，北海道交通局喺當地時間2025年12月18號上晝10點左右派調查官去到呢架機場巴士嘅營運商北都交通嘅大曲營業所，開始進行蒐證調查，以查明起火原因。

根據北都交通所講，起火嘅機場巴士係2015年製造，事發前已經行咗118萬公里，當日發車前例行檢查並未發現巴士有異常，佢哋公司會全體共同努力，加強安全運營，防止呢種事件再次發生。

重返事故現場：疏散咗乘客就要疏散埋行李

當地時間2025年12月17號1140時左右，北都交通旗下一架高速巴士由一名66歲司機駕駛，接載40名乘客由札幌去緊新千歲機場，喺道央自動車道起火。雖然火勢猛烈，但唔單止巴士上所有人，係連所有行李都成功疏散。

呢樣就要歸功於巴士司機…

根據途經嘅目擊者所講，起初見到呢架機場巴士車尾冒出白煙，佢哋曾經嘗試用水滅火但唔成功，巴士車尾好快就充斥烈焰同埋燶煙。

而喺呢架起火嘅機場巴士上面，情況聽落就更加嚴峻…

起火嘅機場巴士由一名66歲嘅司機駕駛，佢喺行車期間不時留意周圍環境，因而及早喺睹後鏡發現巴士車尾冒出白煙。發現「出事喇」之後，佢即刻將巴士靠左停低疏散乘客，同時用無線電聯絡同公司嘅其他巴士司機嚟幫手。

當起火巴士上嘅乘客成功疏散落地嘅同時，66歲嘅巴士司機就趁住火勢未係好大，冒險爬入行李艙疏散埋乘客嘅行李…仲要係成功將所有行李由行李艙「救出」。

無幾耐之後，一架途經嘅巴士到咗，接走咗5名乘客，而另一架巴士亦隨後趕到接埋淨低嘅35名乘客…成個「營救」過程都只係10分鐘，而呢班乘客去到新千歲機場都只係比原定時間遲咗一句鐘。

上面嘅截圖係喺當地時間2025年12月17號1147時左右嘅情況，根據拍攝嘅巴士乘客接受當地傳媒訪問時所講，「我哋到達嗰陣，現場只有煙霧，所以前面巴士嘅司機正係搬走行李。但火好快就燒起上嚟，所以我呢架巴士嘅司機就嘗試用滅火器滅火。我睇見呢啲巴士司機走埋去着火嘅巴士，我當時就諗『佢會不會爆炸？佢係咪安全？』，而巴士司機真係勇氣可嘉」

而據目擊者所講，面對當時咁危急嘅情景，巴士司機以身犯險疏散行李都只係輕輕咁話「因為知道火勢會蔓延，所以當時非常專注，同埋要比平時更落力協助乘客。」

消防員到場後用咗大約一個半鐘頭先至完全撲滅火勢，起火巴士完全付諸一炬，但一眾乘客個人到行李能夠全身而退，巴士司機臨危不亂以及迅速反應係明顯嘅重要關鍵。