德國鐵路採購3 300架新巴士 公司史上最大規模協議

德國鐵路（Deutsche Bahn，DB）同MAN商用車以及比亞迪簽署新嘅框架協議，採購大約3 300架新巴士畀德鐵區域運輸（DB Regio）使用，消息指當中大約95%新車由MAN提供，只有其餘5%由比亞迪提供。

呢份協議當中所採購嘅大部分新巴士會採用混合動力或純電力驅動，計劃喺2027~2032年間交車畀德鐵區域運輸並投入德國各地為公眾提供服務；據悉協議入面有小部分巴士將會採用高效柴油動力系統而唔係電動。

呢份協議當中，MAN商用車將提供大量低地台以及城際巴士，當中包括混合動力以及純電動巴士；而比亞迪就只會提供少量純電動城際巴士，由位於匈牙利嘅工廠提供。

德國鐵路目前亦正在同歐霸（IVECO）、斯堪尼亞（Scania）、戴姆勒客車（Daimler Buses）、中通客車（Zhongtong）洽談簽署補充框架協議，以確保有足夠嘅新巴士供應。

德國鐵路區域運輸董事會成員Harmen van Zijderveld表示：有咗呢批新巴士，旅客將繼續以可靠、舒適兼且環保嘅方式抵達目的地。長期合約確保德鐵區域運輸始終擁有現代化車輛，並且能夠同製造商緊密合作，進一步改進。呢份協議當中絕大多數巴士都係嚟自慕尼黑嘅製造商，對德國嘅工業重鎮嚟講無疑係個好消息。

呢份協議係德鐵區域運輸歷史上規模最大嘅同類協議，6年內採購大約3 300架單層巴士以及掛接巴士，總價值超過10億歐元。採購協議當中包括有混合動力巴士，採用電動摩打搭配使用替代燃料（例如「加氫處理植物油HVO」）引擎相結合方式，符合歐盟6e排放標準。

所有新巴士都會喺座椅配備USB插座，並且配備嘅冷氣系統會使用唔影響氣候嘅「雪種」、LED 頭燈、轉向輔助系統、倒車鏡頭。

MAN商用車董事總經理Dennis Affeld表示：透過呢項框架協議，德國鐵路將獲得一套極其靈活嘅整體解決方案，涵蓋高效柴油巴士、混合動力巴士、純電動巴士。MAN能夠為每條線路嘅需求提供合適嘅技術，同時協助實現未來幾年嘅氣候目標。