姜濤2025年生日應援電車首航 熱潮再掀街頭狂歡

2025年4月伊始，隨著人氣偶像姜濤嘅生日臨近，一群忠心粉絲「姜糖」早已經摩拳擦掌，準備以唔同方式為偶像慶祝。

2025年，香港街頭再度掀起一陣「姜濤風」，而焦點就落喺全新登場嘅姜濤專屬電車應援活動上。呢次嘅應援電車唔單只係對姜濤嘅一份生日心意，仲象徵着「姜糖」多年嚟嘅支持同埋陪伴。

姜濤香港後援會一如以往，再度選擇象徵本土文化嘅香港電車作為宣傳平台。2025年應援計劃其中一個引人注目嘅項目就係4架別具風格嘅生日應援電車，每架電車都配有專屬車身設計。

2025年版本嘅姜濤生日應援電車會由2025年4月5號去到2025年5月2號行走喺港島北部嘅香港電車路線，相信都會引起一班「姜糖」鍥而不捨咁樣「窮追猛搭+影」。

其中，由前・編號#9嘅嘅載客電車改裝而成編號#300嘅全密封廣告電車更加係別具心思，將地點牌改成「430 姜濤灣 Keung To Bay」，成為市區街頭矚目焦點。

除咗行走喺電車軌上面嘅電車，應援活動仲遍及電車軌旁邊嘅地區，例如有銅鑼灣黃金廣場、金百利中心嘅戶外廣告牌，進一步渲染「姜誕」節日氣氛。

近年來每逢姜濤生日，一眾「姜糖」都期待能夠以「免費搭電車」嘅方式參與呢場「屬於大家嘅慶祝盛宴」。雖然2025年相關安排喺截稿嘅一刻尚未正式公佈，但無阻「姜糖」熱情，佢哋紛紛走上街頭，追隨應援電車，合影留念，為偶像打卡。可以預見，到咗姜濤生日當日，銅鑼灣等主要地區將會再次湧現人山人海歡慶場景。

由街頭去到社交媒體，姜濤應援電車唔只吸引「姜糖」目光，更加令到途經市民感受到呢份濃厚支持同埋祝福。正如「姜糖」所言，呢個唔會只係1場生日應援活動，更加係1份連結偶像同埋支持者嘅情感橋樑，見證着「姜糖」同姜濤一同走過嘅每一步精彩旅程。