三菱ROSA正垃圾？江湖術士「斷正」晒啦！

Screen Capture: EP18 三菱 Mitsubishi Fuso Rosa (BE7仕様) x JoJoBUS

關於三菱 Rosa 小巴嘅可靠性問題，我哋都講過唔少。亦因而搞到唔少人認為我哋針對豐田Coaster，只不過《Toyota Coaster 以為我哋一定無? 一次過嚟三部》嗰一集影片可說是拆解晒所有「誤會」，應該都無乜人會再質疑本台 (或小弟本尊)。奈何一眾江湖術士豈會就此罷休，聽聞最近似有所行動，不過都唔駛小弟出動 (亦無法出動 while 早已被有關平台封殺) 就有其他人拆晒所有局。

話說 Facebook 嘅商用車討論區群組日前有相信係三菱 Rosa 車主出 post 大爆部車有幾垃圾。

而由於該討論區嘅主事者唔知幾時全無通知我到底犯咗乜嘢所謂版規之下 block 9 me，所以都係被動地從啲友好 cap 圖俾我知道而「食吓花生」咁啦。友好們有提到群組中都有留言認為係車主或其聘請嘅司機操作有問題，再甚有留言貼出代理商的手冊內頁指如果極力子操作有不當就會發生事主認為質素垃圾嘅場面。

Extraction of screen capture from Facebook 商用車討論區

呢單嘢在一定程度上證明我哋 (尤其是我本人) 一直指「批評三菱Rosa 質素好大可能都同操作錯誤有關」嘅講法，係有事實根據而非胡亂蔑造或憑空想像，進一步還我哋嘅清白。關於個 post 提及嘅兩樣故障，即管循基礎機械理論為基礎做一啲解說，俾大家有更多嘅了解之餘，更起碼可以引證「容易壞」之處都好大可能真係司機 and/or 車主嘅問題。

第一，吊極力子呢樣嘢其實真係「抵打五百大板」，因為起步或完成轉波之後左腳必須盡快完全離開極力子踏板 should be a must，理應係任何司機都知道嘅常識。假設嗰位 Rosa 司機真係係咁吊極力子，實際原因同動機係乜就當然唔知，但純粹理論層面去分析，不外乎係司機响行車期間感覺認為引擎動力輸出不足。但呢種情況稍為正確啲嘅做法係拖波 (即5轉4、4轉3)。

套用响個 post 提及嘅車款上，其中一個可能性係 (我個人親身體驗) Rosa 嘅3波同4波比豐田Coaster 較為「長氣」，並非如 Coaster (15B 或 N04C 引擎) 般「掂一掂」就可以轉波。言下之意，如果將操控豐田 Coaster 嘅方式套用於三菱 Rosa，確係有可能覺得架車唔夠力的。

仲有另一個可能性就同個 post 提及嘅第二個毛病有關。Air intake Sensor 本身於車主而言嘅用途係監察住進氣濾芯 (俗稱「風格」) 是否「夠鐘」需要更換，其運作原理係監測進氣流量，目的係確保有足夠嘅空氣進入引擎氣缸。所以，若發覺流量下降的就會「出 code」，正常而言應該係要更換濾芯。但個 post 話經常發生仲有最少三個可能性，第一係 Sensor 壞咗 (最經常被以為係咁而持續更換嘅零件)；第二係進氣管道內有阻塞導致流量下跌 (呢個可以另外用儀器檢查得到，若屬實就要更換相關零件)，第三係司機長期「地板油」駕駛。

第三種可能性嘅成因係引擎電腦嘅運作係持續計算進氣量與油門深度是否配合 (當然仲有其他數據啦) ~ 油門踩得越深 vs 進氣量要越高。相對地就好容易出現進氣量不足，然後「出code」，跟住就會認為「三菱 ROSA 好易壞」。至於 link up 返吊極力子，就是即使未「出code」，引擎轉數上升速率都會較慢，然後就感覺上「架車唔起」於是吊極力子稍扯高轉數。

但事實上不論三菱 Rosa 還是豐田 Coaster，Euro 3 以上嘅引擎均配備 Turbo，起步加速已經無需「波波盡，腳腳到底」；尤其是 Euro 5 / 6 嘅三菱 Rosa 所配備的 4P10 引擎，控制油門嘅模式猶如私家車般已經力量充沛；相反的「地板油」就會因為引擎電腦程式嘅 Acceleration Lock 而「踩極都唔去」 (豐田 Coaster 最新嘅 2GD 偈未試過，唔知表現如何因而唔 comment) 。

撇除「揸慣豐田」嘅問題，有唔少思想未有如前特首董建華所言與時並進嘅老前輩，腦海裡仍是 BB40 (Euro 1 Coaster)、BB23 (1984年「香港初代」 Coaster)、實力鐵板燒(日產Echo)、柯士甸、磨地雞 (Morris) …… 嘅操控模式 ─ 必須踩地板谷到盡扯到行，因而就有可能導致呢個問題發生。順帶一提，過去呢十年八載常有聽聞甚至見識過豐田 Coaster 嘅 N04C 引擎出現過熱衍生嘅故障，我一直懷疑都同呢種「半世紀前駕駛模式」有關，只是始終未有機會詳細了解因而未能證實。