肺炎扼殺運輸業 捷輝成第一滴血

經營紅磡、黃埔花園專線小巴服務逾40年嘅捷輝小巴喺2020年4月9號黯淡宣佈結束經營。

也許某啲網民，例如堅定相信石油氣小巴「眼不見為乾淨嗰啲」者，又或者例如某啲覺得「唔跟大隊天下無敵就聽揸兜乞食」者，會興高采烈要「開香檳顏射」。

但現實啲咁講，今次點都係一個民生問題，只係識得玩「用車選擇」呢啲個人喜好，會唔會幼稚咗少少呢？況且，車款只係經營因素嘅一小部份。

疫情持續，虧損惡化，只好說句「多謝支持，再見」自武漢肺炎瘟疫爆發以來，客量持續下跌，使本公司自2017年港鐵觀塘線延線通車以來出現的業務困境雪上加霜，已到了無以為繼的地步。而且，客觀上無法預視疫情能短期內解決，意即無法預視經營情況有改善…

Posted by 捷運管理有限公司 CFM Management Co., Ltd. on Thursday, April 9, 2020

港鐵觀塘延線通車，運輸署以此喺路線重組安排上「玩嘢」，捷輝早已「重傷」，武漢肺炎只係壓垮整間公司嘅「最後一根稻草」，真誠為香港嘅人相信都應該睇通睇透反對。

多年嚟捷輝特立獨行，希望唔只單純運豬咁接載乘客，屢屢同政府各個相關部門同埋既得利益者明刀明槍開火，或者有人認為，要是捷輝「同政府『合作』」，未必會不斷遭到針對而唔需要搞到今日咁嘅田地。

但又咁講，若你認為不論政府合理唔合理都只能「say yes」，即係你抱住「盲從威權嘅奴才思維」，你可會考慮回到古代生活好啲？

就講當年「石油氣小巴」計劃，若然無捷輝引入Euro 3 柴油小巴，一個謊言持續十幾廿年，但到真相總有被揭破之時，你又會想講乜嘢呢？

唔係話乜都賴晒去政府，但平心而論、客觀咁講，所謂「一隻手掌拍唔響」，捷輝當然係會有佢嘅問題，但點都必定會有其他因素，而政府嘅問題同責任，無可能一句「政府大晒」就當睇唔到――淨係有公開披露出嚟喺路線重組嘅「玩嘢」，面對有正常智力或以上嘅人，運輸署根本好難自圓其說解釋。

捷輝「結業」應該已成定局，之後整個公共小巴行業，以至整體公共運輸業仲會發生乜事，真係「拭目以待」。

或者就過去九個月港府針對邊個行業都喺今次新型冠狀病毒（武漢肺炎）大瘟疫被「回力鏢」，捷輝嘅「暴斃」又算唔算係大家放任運輸署嘅自作孽呢？