【綜合英國外電】位於倫敦西南部，舉辦知名國際網球賽事嘅溫布頓 (Wimbledon) 响當地時間噚日早上發生電動巴士火警，一部電動雙層巴士焚毁，幸無人傷亡。倫敦市長簡世德 (Sadiq Khan) 及市議會非常關注事件與及同型號嘅雙層巴士嘅安全問題，要求倫敦運輸局及巴士製造商 Switch Mobility (前身 Optare) 妥善處理。
火警發生响英國時間1月11日早上 7:21，一部行駛200號路線，車牌YJ21 EYP 嘅 Optare Metrodecker 1050 電動巴士，駛至距離溫布頓火車站僅約300米嘅街口，車尾突然傳出巨響起火，乘客及司機及時逃生。
由於事發位置剛為住宅區，唔少居民被疑似爆炸嘅巨響嘈醒。倫敦消防處於7:23 接報後，指派新美登 (New Malden) 消防局派出三部消防車共十五名消防員趕赴現場撲救。由於涉及電動巴士衍生嘅風險難以準確評估，倫敦大都會警察亦前赴現場，架起長達80呎 (25m) 嘅封鎖線並協助疏散附近嘅居民。消防員經過約三小時灌救，火警响早上大約10:30 撲熄。肇事巴士由拖車拖走，附近道路亦隨後解封。
《地鐵報》 (Metro) 訪問前消防員Neil Pedersen 評論事件。佢指出撲救鋰電池需要用嘅水理論上比電油或柴油汽車多10至15倍，更存在一發不可收拾嘅風險，「今次成功撲救真係非常幸運」。
英國傳媒報導指同款電動巴士為兩年內第二宗同類型火警，對上一次發生响2022年5月22日，地點為北倫敦鿋福郡 (Hertfordshire) Metroline 巴士廠內，共六部巴士焚毁，不禁使人擔憂呢款 Metrodecker 1050 嘅安全水平是否適合繼續行走。保守黨倫敦市議會交通政策發言人彭士堅 (Keith Prince) 接受《每日郵報》訪問時表示，已經去信市長簡世德要求徹查現時响倫敦行走嘅85部同款巴士，竭力確保唔會再發生同類事件，保障乘客及巴士行駛沿線嘅居民。而市長簡世德亦回覆傳媒查詢時表明會要求倫敦運輸局 (TfL)及巴士製造商 Switch Mobility 配合今次意外調查及研究同款巴士嘅安全水平有否需要作出改善，但目前無意要求停駛呢款巴士。
《每日郵報》更獨家分析，質疑由前首相約翰遜 (Boris Johnson) 出任倫敦市長時於2014年推動倫敦巴士電動化計劃是否操之過急。另外指今次火警連同現時約1000部巴士嘅使用可靠性問題，對於現任市長簡世德「2034年巴士全部電動化」嘅計劃目標能否達成構成壓力。
Be the first to comment