願新巴別離去 同人本中找「你」

「新世界第一巴士服務有限公司」（英語：New World First Bus Services Limited，縮寫：NWFB，簡稱：新巴）喺1998年成立嗰陣，得到嘅巴士專營權係之前由中巴經營嘅香港島路線，當時係城巴嘅主要競爭對手。

不過到咗2003年，就變成姊妹公司關係。2020年開始就一齊改為屬於匯達交通服務嘅成員公司，匯達交通喺2022年7月12號獲得香港行政長官會同行政會議批准之後，宣佈新巴專營權會喺2023年7月1號合併入全新嘅城巴市區及新界巴士網絡專營權，新巴正式結束25年嘅營運歲月。

隨著新巴專營權宣佈結束，巴士迷圈都一直追逐「送殯」。而到咗新巴專營權正式結束，坊間都已經有林林總總由各有多年相關經驗嘅出版社推出嘅刊物。事隔至今大約半年，又有一本新巴紀念刊物推出，而今次係由一個細小群組搞嘅「同人本」。

由小西灣邨總站工作室推出嘅《再別世一》，屬於「同人紀念相集」，「B5」大細，內頁68頁，收錄咗工作室成員所拍攝嘅超過200張自宣佈新巴專營權合併入全新嘅城巴專營權到新巴專營權最後一夜嘅精選相片。

詳細內容就梗係自己買返本慢慢睇啦！

（頭先同作者講起，佢都明今次印刷係偏色咗啲嘅，大家將就吓）

呢本《再別世一》喺2023年12月24號嘅「Rainbow Gala 30」正式發售，攤位係九龍灣國際展貿中心3樓展貿廳2「Pink5」攤位，去開嘅記得支持吓。

誠如葉錦龍之前喺Creative Paradise講過，其實二次元文化同公共交通嗜好文化喺香港早就應該共融，令香港同人文化向更廣闊領域發展，令公眾接觸得多，可以減少誤解同埋曲解。

今次小西灣邨總站工作室就正正行緊呢個方向。