信興集團引入電動小巴

全港第二部完成運輸署車型檢定（Type Approval）嘅電動小巴正式登場。由紮根香港70年嘅信興集團旗下「信興新能源」引入嘅電動小巴 MOONCA「滿客」，今日喺發佈會上同傳媒見面。

MOONCA電動小巴全長7.2米，接近2.3米闊，車廂內即使排佈19張450mm闊嘅高背座椅下，仍然擁有寬敞空間及通道。底盤配備有前後氣壓避震系統，以及四輪雙氣路通風碟煞車，有別於現時一般小巴使用嘅葉片鐵彈簧避震同鼓式煞車，都可以為為乘客提供可媲美旅遊巴嘅舒適享受之餘，亦減少維修嘅次數，從而增加小巴服務時數同減低維修成本同費用。

全新嘅MOONCA小巴根據香港374A章《道路交通（車輛構造及保養）規例，進行車身同底盤嘅全新設計，並非由現有車款進行改裝。除咗車廂同機械結構嘅設計外，電池亦被安放於車底地台之下，以達到更佳嘅前後重量分佈，亦因為遷就電池擺放，第一部樣辦車地台採用「兩級踏步」設計，但亦都有條件生產出低地台無障礙版本。雖然採用梯級登車設計，但登車嘅離地距同梯級高度都比一般小巴為低，方便乘客上落。

電池方面，採用格力鈦新能源出品嘅鈦酸鋰（LTO）電池，雖然續航距離只有大約100公里，但特點係充電速度較普遍電動車採用嘅磷酸鐵鋰電池快好多，由10%充電到90%只需約18分鐘，而採用雙插座以330A快充，亦只需8-10分鐘就可以行走提供大約50公里嘅行車里程，所以行走路程相對較短嘅專線小巴更為合適。而MOONCA小巴車頂亦設有 OppCharge 頂置充電系統，可以使用安裝於交通交匯處天花板嘅集電弓作330A嘅快充。

而電池安全方面，格力鈦新能源出品嘅鈦酸鋰（LTO）電池喺廠方經過反覆測試，耗電時針刺都唔會產生明火。當電池溫度達30度以上時，電池溫度控制系統亦會由頂置冷氣輸送冷卻水到電池提供散熱。

根據海關公佈售價，MOONCA小巴嘅車價大約為$200萬港幣左右。政府推出嘅「電動小巴先導計劃」下，政府會撥出$8000萬港幣，供小巴型辦商申請，資助車價一半去購買一共40部電動小巴。至截稿時，「先導計劃」下有七個認可電動小巴供應商，兩款小巴已通過運輸署車型檢定。首批電動小巴，估計將會於九龍塘區專線小巴線投入服務。而又一城嘅九龍塘公共交通交匯處集電弓充電裝置，亦預計於年底或之前開放供營辦商使用。