「所謂新款」嘅三菱 Rosa BE7仕様於去年年中响香港市場正式推出以來銷量都不俗，不過只集中於旅遊巴市場，與及復康機構嘅「福祉車」版本，公共小巴版本一直只聞樓梯響但未有正式露面。三菱代理環宇汽車有限公司噚日响長沙灣陳列室正式展出，邀請業界參觀完成晒 Type Approval 嘅樣版車。
基本外型同去年本台測試介紹過嘅 JoJoBus 購入嘅「No. 1」可謂一模一樣，頭幅依然係「判官」勁like而「Lim叔叔」極憎嘅模樣，但當然車頂裝設咗路線牌箱。
長度則為「7m」(6990mm)，乘客門改為電控真空操作開關摺門。車尾則由 JoJoBus 的嗰部嘅雙尾門改為單尾門。車身噴髹上專線小巴嘅法定顏色黃身綠頂，而車呤亦噴上米黃色，彷彿「襯返一套」。
車廂當然裝設咗19座位，座椅為「香港品牌」Vega Seat，第一排座椅裝配三點式安全帶，其餘的則為兩點式。據Vega Seat 透露，今次安裝於三菱Rosa 嘅座椅為「公共巴士版本」，櫈架結構及椅墊比旅遊巴規格有所加強，面料人造皮亦有「加料」，提升整體嘅耐用性。
至於「因2016年時任運輸署署長楊何蓓茵於立法會會議直言業界普遍採用嘅小巴車款只能裝19個座位」而多出嘅空間，代理則將之劃為一個小型行李架，方便携帶小型行李嘅乘客，尤其是例如屯門區嘅43系，西貢區嘅2、3、4號線等俗稱「買餸線」嘅街坊，定必更感代理嘅貼心細緻。
駕駛室佈局同本台測試介紹過嘅嗰部一樣，但中控台加裝咗台灣北圜實業 (Lucky Yu) 路線牌控制器。
BE7 ROSA 上嘅呢套「北圜」路線牌為全新規格，除咗顯示範圍全面擴充至整片牌箱玻璃 (點數為160×64) 之外，LED 晶片更是台灣近年新技術，工作頻率由以往的 60Hz 提升至大約100-130Hz，令到顯示映像更穩定，尤其是陰天、晚間，即使「散光」度數較高的人士嘅視覺映像都得到改善；加上電路板印刷焊接亦採用新技術，可靠性進一步提高。
機械規格仍然係 4P10 引擎，波箱只有 Dunoic 2.0 自動波箱供選擇；制動系統為四碟迫力，附ABS 及設有廢氣煞車，但智能緊急煞車系統 (AEBS) 及車道偏離警示 (Lane Keep Assist) 則列為附加選配設備。至於業界可能顧慮「唔夠收，唔可靠」的話，不妨重溫返本台《EP18 全新 三菱 Mitsubishi Fuso Rosa (BE7仕様) x JoJoBUS》影片節目中由璧屋「直衝落山」至南邊圍迴旋處 嘅一段。加埋 Hill Start Assist 斜路起步防溜後裝置，整體使用上其實無需過份擔心「好易壞」。單係實際耗油量比同級車款慳近三成，客觀理論上對於小巴業界應該有返一定吸引力。
整體而言，FUSO 廠方及代理算是做足準備才正式推出 ROSA 公共小巴，環宇汽車亦明白維修支援乃爭取業務關鍵，將會為客戶提供多項「維修保養套餐」，客觀上算是明白業界嘅期望。至於有關詳情及售價等事宜，請與環宇汽車有限公司聯絡查詢。
Be the first to comment