新巴人力車觀光巴士「宜靈疑異」帶乘客港九探靈

新巴喺2022年10月14號公佈，喺萬聖節期間，旗下「人力車觀光巴士」會開設特別路線「H1W」，以「探靈」為噱頭，同乘客一齊感受萬聖節氣氛。

「H1W」由中環碼頭同埋旺角染布房街對開，途經一啲知名地標之外，仲會經過一啲同「鬼魂」有關嘅地方附近，例如普仁街、溫思勞街、跑馬地墳場等。

一輪「試路」之後，「H1W」喺2022年10月22號投入服務，「首航」嗰陣喺中環天星碼頭總站排起人龍，除咗原本安排嘅新巴#5552開篷巴士之外，仲要由城巴#26開篷巴士做加班車。

特別路線當然就有啲特別嘢要搞吓，新巴喺「H1W」嘅人力車觀光巴士車廂掛有萬聖節相關嘅吊飾，而且仲專登喺電子路線顯示牌整咗「H1W宜靈疑異」主題圖案。

如果講到途經嘅地方，相信最有特色就係「老龍坑街巴士站」喇！

「老龍坑街巴士站」位處紅磡「溫思勞街」，呢度對公眾嚟講，特色就係喺公眾殮房、殯儀館附近嘅街道有唔少殯儀相關嘅舖頭，而坊間仲有人言之鑿鑿咁話呢條街個名其實係叫「運屍路」，喺夜深人靜嗰陣夾雜「都市傳說」都幾有靈異氣氛。

至於對巴士迷嚟講，「老龍坑街巴士站」嘅特色就係只有城巴機場快綫嘅A20號路線會使用呢個巴士站，面對新型冠狀病毒（武漢肺炎）肆虐全球令到無得搭飛機嘅日子，城巴機場快綫嘅A20號路線已經暫停服務一段日子，今次就係呢段日子入面難得再有雙層巴士行入紅磡「溫思勞街」嘅情況。

返到九龍嘅總站，就設喺旺角染布房街，即係九巴203C號路線往尖沙咀東麼地道方向所途經嘅「麥花臣遊樂場巴士站」。

就同中環嗰邊一樣，旺角都係有唔少乘客排隊等候乘搭「H1W」號路線，大家都覺得「畀$39.8搭開篷巴士感受萬聖節氣氛…而且車程都幾耐…抵啦！」

但係對於巴士車長嚟講，「H1W」號路線「車程幾耐」就可能係另一番體會喇！