善水德政：新巴城巴應用程式刪除啟動時全頁廣告

隨著資訊科技不斷發展，依家已經係公眾往往可以揸住一部智能電話，利用流動應用程式就可以迅速知道唔少以前完全只能「盲摸摸」嘅資訊。

近年各間主要公共交通機構都各自發展出自己公司嘅一套智能電話流動應用程式，無疑係令到乘客可以更方便咁得知嗰間公共交通機構嘅最新資訊，以至快速搜尋出方便到自己嘅乘搭路線。

然而香港呢一個資本主義社會，喺「自生自滅」嘅自由市場入面，私營機構難免需要接納一啲廣告去彌補一下成本支出，呢一啲智能電話流動應用程式亦難以逃離呢一個模式。

但係——即係咁講——廣告擺喺乜嘢時間跳出嚟，往往會影響到受眾對於呢間公司嘅形象同埋接納程度。

其中一種受到一眾乘客所詬病嘅情況就係：

一打開個流動應用程式嘅時候就被全頁廣告阻住

等到熄咗個全頁廣告嗰陣時

『車都走咗啦！！！！』

（大量乘客真實對白）

就喺2022年10月1號，新巴城巴表示會即時刪除打開流動應用程式時跳出嘅全頁廣告，令到用者可以更快入到去流動應用程式，盡快搵到相關需要嘅資訊。

刪除打開流動應用程式時跳出嘅全頁廣告，毫無疑問係絕對值得掌聲嘅「德政」，甚至可以話，有公共交通機構終於返到去當年開發流動應用程式人員，以至公司員工曾經一度堅持、但被迫放棄嘅嗰一份想方便到乘客、挽留到乘客嘅「初心」。

不過，新巴城巴拎著呢個消息，卻喺10月1號嘅所謂「國慶日」，只係用網絡社交媒體嘅1個24小時限時動態公佈，面對鋪天蓋地「講好香港故事」嘅「國慶日」新聞，咁樣做有幾多公眾會知道或者見到？

希望公司明白到

員工做嘅

從來都唔係可有可無嘅小事