九巴新一代電動單層巴士——比亞迪 B12A——自從2022年4月25號正式投入載客服務，繼行駛穿梭九龍區核心路線後，喺2022年9月24號正式走入安達臣發展區，行駛213M號線（安泰←→藍田站 (循環線)），為居民帶來新嘅乘車體驗。
九龍東立法會議員顏汶羽、觀塘區議員許有為（安達）、林瑋（觀塘安泰）都親身出席213M號路線電動巴士首航儀式。
顏汶羽表示，九巴派出電動巴士行駛途經鬧市路段以及新住宅區域嘅路線，相信有助減低鬧市環境污染，並為市民帶來更怡人嘅居住環境。佢指出，香港政府已經訂立爭取喺2050年之前實現「碳中和」，要達到呢個目標，有賴各界通力合作，而九巴積極推動電動巴士服務，會有好大幫助。佢期望更多電動巴士投入服務，擴大服務範圍，促請政府同埋業界攜手，向業界提供便利，共同建立綠色運輸系統。
九巴助理車務總監 (區域一) (署理)麥成邦指，九巴自2016年開始服務安達臣區居民，由最初6條巴士路線，發展到依家嘅13條巴士路線，再配合完善嘅巴士網絡同埋轉乘優惠方案，九巴將安達臣區居民接駁到全香港。佢又指，今次安排最新純電動巴士行駛安達臣發展區，畀居民享受清新空氣以及寧靜乘車體驗，九巴重視居民日常出行需要，承諾會繼續投放資源，同運輸署緊密合作，為安達臣發展區居民服務。
九巴致力發展環保車隊，新一代電動巴士自2022年4月投入服務之後，連同213M號路線，已經合共行緊7條市區路線——其餘路線都係途經九龍區核心路段，包括：
- 1
- 1A
- 6
- 11D
- 14B
- 203C
穿梭安達臣發展區嘅213M號路線加入電動巴士之後，意味九巴新一代電動巴士服務範圍擴大到7條路線。
為鼓勵乘客支持「綠色運輸」，九巴趁著213M號路線比亞迪 B12A電動巴士首航嘅日子，向乘搭行駛呢條路線電動巴士上嘅乘客送出一套3款電巴襟章嘅「精美」禮盒，更加附有印上專屬編號嘅乘搭證書，吸引大批市民喺首航當日特登去到安泰巴士總站排隊乘搭213M號路線。
當然呢啲咁樣嘅所謂「盛事」就一定要睇吓個「盛況」：
臨近中午時分，當九巴嘅比亞迪B12A單層電動巴士準備駛入安泰巴士總站嘅時候，唔少等候多時嘅巴士迷都喺馬路邊拎起相機同電話影低呢個重要時刻。
至於專誠想搭吓比亞迪B12A單層電動巴士首航213M號路線嘅數以百計市民，一早就已經喺安泰邨總站排隊，人龍一直由站頭排到去兜入安茵街，有啲無留意呢次首航消息嘅居民不禁喺度問：
家陣九巴唔收錢畀你哋搭車咩？
同一時間，有部分居民見到條人龍咁長，索性淨係同嗰架準備首航嘅電動巴士影相打卡就算喇…咁當然九巴都唔會話就咁擺低架巴士喺度畀大家打卡，佢哋都喺車頭擺咗今次電動巴士首航嘅宣傳板。
隨著臨近中午1235時首班213M號路線比亞迪B12A單層電動巴士開出嘅時間，喺安泰巴士總站守候多時嘅乘客都情緒越嚟越高漲，不時舉起✌🏻手勢歡呼。
不過通常呢啲「盛事」，面對「群情洶湧」嘅情況，往往都唔會一帆風順…
正當現場九巴職員準備安排喺站頭排隊嘅乘客，依照排隊次序登上首班213M號路線嘅比亞迪B12A單層電動巴士，現場一名乘坐電動輪椅嘅乘客表示：
你哋點都要畀我上車先㗎啦！
不過由於呢位乘坐電動輪椅嘅乘客，其實真係比現場排喺龍頭嘅乘客較遲到達巴士總站站頭，經過同現場九巴職員擾攘一輪之後，大家認同雖然按照一般乘搭公共交通工具嘅傷健人士優先原則，可以畀呢位乘坐電動輪椅嘅乘客優先上車，但佢得到嘅證書編號會係較一早已經到站頭排隊嘅乘客為後。
現場九巴職員亦都隨即安排，派發一套3款電巴襟章嘅「精美」禮盒同埋印上專屬編號嘅乘搭證書畀排喺總站人龍最頭嘅10名乘客，再一齊去到電動巴士嘅車頭拍照留念。
然後現場嘅九巴職員隨即安排之前乘坐電動輪椅嘅嗰一位乘客上車…再安排已經攞到1~10號乘搭證書嘅乘客緊隨其後登上電動巴士。
而其他喺巴士總站等候多時嘅乘客，亦都陸續獲得安排登上呢架首航213M號路線嘅比亞迪B12A型單層電動巴士。
一眾等咗好耐、成功登上咗呢一架首航215M號路線嘅比亞迪B12A型電動單層巴士、拎到乘搭證書同埋「精美」禮物嘅乘客，上到巴士之後都表現得非常雀躍，紛紛歡呼喝采。
首航嘅呢一架比亞迪B12A型電動巴士一直沿著213M號路線行走，落咗去藍田站之後就再兜返上安泰邨。雖然其間有乘客一度心生不忿，表示質疑：
點解喺中途站上車、唔需要預早幾個鐘排隊嘅乘客都一樣得到乘搭證書同禮物？
但到咗返到去安泰邨總站嘅時候，巴士上面嘅唔少乘客都依然為能夠參與首航而紛紛拍掌歡呼。
不過通常呢啲「盛事」，面對「群情洶湧」嘅情況，往往都唔會一帆風順…
如果有搭過呢一款比亞迪B12A型電動巴士嘅乘客，可能都會留意到呢一款巴士喺人多、天氣炎熱嘅時候，冷氣嘅製冷同埋送風量都係「麻麻地」。而首航嘅呢一架比亞迪B12A型電動巴士當時就滿載乘客，連通道都企滿人，結果呢個「麻麻地」嘅冷氣就引發咗一啲問題：
正當較早前講過嗰位乘坐電動輪椅嘅乘客都已經喺總站落車，九巴嘅職員就發現有一位婆婆遲遲未能夠起身落車，據講可能就係因為人多擠逼、空氣唔流通，令到呢位婆婆覺得唔舒服。
老人家覺得唔舒服係可大可小，職員隨即報警求助，當局都好快派出警員同救護員嚟到現場，將呢位婆婆送院檢查——希望呢位婆婆無大礙啦！
由於現場一度報稱有幾百人排隊等候嘗試乘搭213M號路線一批新投入服務嘅電動巴士，面對咁多潛在嘅乘客，九巴一度派出合共3架比亞迪B12A型電動單層巴士「招呼大家」：
- YA1125
- YA147
- XZ9932
但…是咁的…即係咁講…
其實好多喺安泰巴士總站排隊等候嘗試乘搭電動巴士嘅乘客，其實都係因為想得到九巴派出嘅「精美」禮品，先自甘願對住一條幾百人嘅人龍苦苦等候，所以當以下呢一張通告出現咗之後…
現場唔少原本滿心期望得到「精美」禮物嘅乘客就「一哄而散」，真係要靠213M號路線出入嘅居民就…
終於可以舒舒服服搭巴士喇！
Be the first to comment