香港男歌手、演員、舞蹈員盧瀚霆（Anson LO Hon-ting，外號「教主」），喺2018年5月參加由ViuTV主辦嘅《Good Night Show 全民造星》，成為5位「Eye catching idol」之一，晉身香港男子組合MIRROR嘅成員。佢喺2019年12月《全民造星II》中獲得「專業大賽冠軍」、2020年2月29號推出首支單曲《一所懸命》以個人身份正式出道。
隨著「人氣」飊升，盧瀚霆嘅支持者（外號「神徒」）喺2021年就曾經包起九巴旗下1架雙層巴士嘅全車身廣告，利用呢架「教主巴士」祝賀「教主」生日快樂。
事隔1年，「教主」又生日喇！「教主巴士」呢樣嘢曾經整過就唔好畀佢停！
2022年有幾位「神徒」自發整嘅「教主巴士」搵嚟九巴嘅12米版本E500型雙層巴士，車隊編號ATENU539，車輛登記TL2141。如果大家有跟開巴士廣告嘅話，應該會留意到呢架巴士上一個全車身廣告就係被部份巴士迷揶揄為「屎水」嘅大台連續劇《愛回家之開心速遞》「龔水CP」。
隨著「龔水CP」「落畫」轉做「教主巴士」，有巴士迷表示就算自己唔係「MIRROR」嘅支持者，但…
能夠終結大台嘅廣告都係「大快人心」！
至於2022年嘅第1架「教主巴士」話就話會掛落112號路線，不過喺2022年6月29號就出沒喺來往梨木樹邨公共運輸交匯處以及葵芳站巴士總站嘅九巴36M號路線。
呢次嘅全車身廣告，除咗喺側邊會有教主嘅肖像同埋祝賀字句之外，車頭擋風玻璃下面仲會有一個幾特別嘅設計：
「CHAPTER 27TH」講緊嘅就當然係「教主」27歲生日咁解啦！至於「AL7795」就係代表「教主」喺1995年7月7號出世，不過呢一組字母同數字用咗白色底黑色字咁樣顯示出嚟——離遠睇似唔似一個車輛登記號碼呢？
唔知會唔會有「神徒」投返AL7795呢個車輛登記號碼出嚟掛喺自己架車上面呢？
順帶一提，九巴嘅36M號路線係現時全香港行車路綫最短嘅跨區專營巴士路線，行車里數只係得3.6公里，長過全條彌敦道少少嘅啫，但服務緊葵青區以及荃灣區。
2 Trackbacks / Pingbacks