為咗鼓勵市民享應環保生活，建立「自攜水樽」同埋「乘搭公共交通工具」嘅習慣，九巴同「Bonaqua®加水站」合作喺2022年1月2號舉辦「Bonaqua®加水站請你搭九巴」活動，畀全香港市民喺嗰日無限次免費乘搭95號路線（佐敦(西九龍站) ←→ 翠林）。
活動當日，行走95號路線嘅巴士都貼咗相關宣傳告示，電子路線顯示器亦有相關字眼，然而…
重點唔係以上呢啲
熱心過九巴嘅巴士迷
本台收到市民王先生報料，佢乘搭1班由西九龍站開出嘅班次，當喺站頭等緊上巴士嗰陣「已經遇到1個著灰色外套戴眼鏡嘅男仔，不停大聲叫『今日免費，大家上啦』」，王先生表示起初以為佢係站務職員，「但後嚟佢跟埋上巴士…」
「然後每次埋站佢都伸個頭出去同行過嘅人講今日免費搭巴士，仲叫啲人快啲由後門上巴士」
正當王先生覺得「乜依家啲後生仔返工咁落力嘅？」，王先生就聽到巴士車長對嗰個男仔講：
「先生你唔係我公司嘅人就唔好再叫人由落車門上車喇吓」
王先生為之一愕，「咁個男仔係做乜？」，然後當嗰個男仔坐喺王先生前排，王先生聽到嗰個男仔話：
「我係巴士迷，我幫緊大家…」
當講到呢度，王先生即時開懷大笑，問返王先生今次事件有無影響佢對巴士迷嘅印象，王先生笑住表示：
「佢都係好心覺得想幫吓人啫，不過大大聲講嘢嗰陣幾煩囉——起碼迷巴士好過啪丸打針食煙劈酒滾女啦！你話係咪先？」
惡過「黑Ｘ」嘅水公司
另一方面，「Bonaqua®加水站請你搭九巴」活動當日，當日12~18時，市民喺位於佐敦海泓道嘅佐敦（西九龍站）巴士總站，自攜水樽去到「Bonaqua®加水站」購買「Bonaqua®優質礦物質水」，就會獲贈1張「麥當勞$10現金券」。
有著數就有人排隊好正常吖！不過就咁…
本台收到市民李女士報料，佢當時喺現場目擊到1件令人感覺唔愉快嘅事件：
「水機公司啲人好粗暴咁對待行過八卦想影張相嘅街坊！」
根據李女士描述，事緣當時現場有人排隊，佢見到有啲路人想影低個情況，但就喺呢個時候，一眾身穿黑色外套嘅水公司職員突然「撲埋身」，出手拍打想影相嘅街坊同埋試圖遮蓋鏡頭。
李女士表示，當時目擊呢個情況，令佢即時諗起「黑Ｘ」阻撓記者採訪嘅場面，尤其現場係公眾地方，市民係有權利喺公眾地方自由拍攝，「依家又唔係影你裙底」。
至於問及覺唔覺得會係水公司未準備好，所以唔想被市民影到佢哋做準備工作，李女士表示：
「佢背後咪即係ＸＸＸＸ，再背後咪即係ＸＸ集團！唔係咁大間老牌公司都唔識做嘢呀嘛？
唔想人影到準備工作就一早搬出嚟之前做好先，一係你喺架『密斗車』上面做囉！
我呢啲師奶仔都識嘅嘢，唔係喺咁大間公司做嘅反而唔識呀嘛？」
Be the first to comment