九巴燈位溜前 的士無端捱撞

2021年12月23號，有1架九巴雙層巴士牽涉1宗輕微車禍。

事發喺朝早11點，當時九巴1架行緊5A號路線嘅富豪B9TL型12米版本雙層巴士（車隊編號：AVBWU553，車輛登記：UW2325），喺臨去到尖沙咀碼頭總站前嘅梳士巴利道遇上紅燈，停低等候轉燈嗰陣巴士溜前，撞埋去前面1架同樣停喺度等轉燈嘅的士。

根據目擊者報料，的士當時載有乘客，幸好碰撞時速度較低，「嘭」一聲之後只係推前咗的士少少，2架車各有損毀，車上司機同乘客都未有受傷。

不過的士做緊生意無端端咁樣被撞，的士司機難免唔係幾高興，目擊者話當時的士司機有埋怨「大家都揸車搵食，使唔使咁『狼』呀？」

兄弟，人無事就算啦！

（相片由兜口兜面目擊事發經過嘅師兄提供）