【山頂纜車】再有第6代車廂上軌 年底完工？肯定唔得！

之前講到，2021年11月30號凌晨時份，香港山頂纜車公司安排工程人員將第1卡第6代山頂纜車吊上路軌，過程順利。

【山頂纜車】第6代車廂上軌 可望年底完工？

去到2021年12月2號凌晨時份，山頂纜車公司再安排工程人員將剩低嘅第6代山頂纜車吊上路軌，過程同樣順利。

香港上海大酒店物業部集團總監孫漫天先生喺第5代山頂纜車最後服務嘅嗰日回應查詢「香港人會唔會有『聖誕禮物』？」嘅時候曾經話「好有可能㗎！」，然而現時工程進度明顯滯後，大家都對孫漫天先生嘅豪言已經…

「打定輸數」

根據喺吊運現場視察進度嘅山頂纜車總經理曾瑛美小姐所言，以現時工程進度嚟講，原有預算喺2021年聖誕檔期用新車廂服務公眾嘅計劃…

「已經肯定趕唔切」

至於香港山頂纜車整個發展計劃幾時先至埋到尾——佢都帶有歉意咁表示：

「確認唔到」

作為香港嘅一個重要地標以至歷史見證，山頂纜車多年嚟都係香港舉足輕重嘅一員，而山頂纜車呢133年一向嘅營運亦以可靠、安全見稱，深信香港人都會接納山頂纜車寧可謹慎行事而唔係一味求搶功——呢個可能反而係其他公共交通服務營運者應該學習嘅一種態度。