港隊東京奧運奪佳績 九巴接連出招撐港隊

東京2020夏季奧運會因為新型冠狀病毒（武漢肺炎）而要搞到推遲1年先至可以舉行，香港奧運代表隊（港隊）一眾運動員努力發揮表現，合共攞到1金2銀3銅嘅成績。

連同替補在內嘅46名港隊運動員喺呢一次東京奧運會，雖然面對由欠缺支援到左派政棍無恥刁難，但運動員無懼重重困難嘅表現，無疑令全香港各階層嘅市民難得喺疫症肆虐嘅陰霾下，重新睇見香港人一直引以為傲嘅拼勁。

早前香港已經有公共交通機構表示可以給予一眾運動員免費乘車優惠——甚至香港電車仲放風希望政府當局批准給予全體香港人一齊免費搭車，畀公眾一同分享呢份快樂——新巴城巴亦舉行「Come and Say BRAVO！齊來向香港運動員喝采！」活動，縱然過程中曾經遇上一啲阻滯，仍然成功收集到一啲市民嘅心意卡，並且安排放上去旗下全線巴士車廂同埋巴士站嘅顯示屏幕，希望藉此為香港運動員打氣。

至於作為香港最大專營巴士服務營辦商嘅九巴，為慶祝運動員的優秀表現，以及向他們致敬，早喺2021年7月26號已經公佈向所有出戰東京奧運嘅港隊成員，送贈1年免費乘搭九巴。

2日後嘅7月28號，九巴更提出向所有出戰東京奧運嘅港隊運動員贈送巴士命名權：每位代表隊成員可為1輛九巴巴士命名，載有命名內容同埋信息嘅名牌將會安裝喺巴士車廂入面嘅車頭位置，以表揚香港精英運動員喺東京奧運會嘅拼搏精神同埋卓越成就。

到咗8月10號，九巴推出2架奧運主題巴士同市民分享喜悅，推廣奧運精神——呢2架巴士主要會安排喺旗下2條來往奧運站嘅巴士路線：

• 66X （屯門（大興邨）←→奧運站）
• 270B （上水←→奧運站）

九巴呢2架奧運主題巴士，車身以白色做主調，配上奧運五環色彩嘅運動員剪影，象徵香港代表團2020年出戰13個大項嘅奧運項目，包括：

• 游泳
• 田徑
• 體操
• 空手道
• 乒乓球
• 單車
• 帆船
• 馬術
• 劍擊
• 賽艇
• 三項鐵人
• 高爾夫球
• 羽毛球

車身仲寫上「PROUD OF YOU」（意指：以你為榮）字句，感謝每一位香港運動員喺奧運會場上光芒四射，為香港創造歷史。

即係咁講，人生在世，有唔少真理係應該恪守，例如：

「做人最緊要公道」

傷健運動員同樣以無比勇氣面對運動場上嘅各項挑戰，九巴喺8月28號公佈向所有參加東京殘奧會嘅港隊運動員，同樣送贈1年免費乘搭九巴、巴士命名權。

九巴表示，同全香港市民一樣，對運動員嘅拼搏表現都感到非常振奮，實在令人敬佩。

其實有樣嘢突然比較關心：

巴士總有一日會退役

平常都係落得「劏車」嘅下場

將來有無人會保育呢啲由港隊運動員命名嘅巴士？