九巴授權遙控巴 準備可以出貨喇！

2016年成立嘅彼樂部創作有限公司，一直以「KONSEPT」為商標，推出一系列仿真遙控車玩具。2021年2月同3月嗰陣，「KONSEPT」推出咗一批得到九巴官方授權嘅富豪B8L仿真遙控車玩具，之前巴士台都有簡單介紹過 (*ﾟ∀ﾟ*)

遙控巴士可預訂 九巴授權無得頂？

九巴授權積木遙控巴 限量發售只出1000架

2021年4月2~6號喺灣仔會展舉行嘅「香港春季購物節」，彼樂部創作有限公司就終於向公眾公開展示呢兩套得到九巴官方授權嘅富豪B8L仿真遙控車玩具實物，吸引到唔少入場參觀人士嘅注意。

而且當時仲可以試玩，不過又咁講，展場個攤位面積有限，喺攤位張臨時枱仔試玩好似點都玩唔夠本 ＿ﾉ乙(､ﾝ､)＿

去到2021年4月13號，網上流傳一啲相片，話喺油站見到終於有現貨開賣…問返彼樂部創作有限公司，其實每間有得賣嘅油站只係先獲派3架，而且本身13號開賣原來算係「偷步」喎！(|||ﾟдﾟ)

但係又咁講，既然已經踏入2021年4月中旬，即係反正都就快正式「派貨」，巴士台一於約定友好預早拎返啲富豪B8L仿真遙控車玩具出街「試車」，咁都唔過份吖！(ゝ∀･)b

首先梗係要「參拜」吓真正嘅九巴12米版本富豪B8L啦！大家一齊喺站頭車坑「陣列在前」先 d(d＇∀＇)

講返試車，細啲遙控玩具嗰兩款起步加速按比例快過真車好多，「一支箭」咁衝，至於遙控積木嗰款大份咁多，自然又重好多，當然速度就慢啲，但用嚟「自娛」係幾吸引嘅。

又咁講，嗱，是咁的…影商品相片，如果叫「判官」上鏡應該無乜欣賞價值㗎喇！今次都係叫李文意嚟影「揸巴士」嘅相片好啲。(ﾟ3ﾟ)～♪

既有12米長嘅富豪B8L、又有號稱「四捨五入都叫做兩米高」嘅李文意，拍埋一齊就比較到呢啲遙控巴士玩具大約有幾大架啦！

大約28厘米長嘅遙控巴士玩具，其實就好輕盈，一次過拎起一對都好容易，拎喺手慢慢鑑賞都無問題。

不過大約74厘米長嘅遙控積木巴士就唔同講法喇！3542粒膠積木真係有返咁上下「斤兩」，大家睇吓李文意抽起佢嗰陣幾咁「七情上面」(°ﾛ°٥)

訂咗貨嘅朋友仔，係咪好心急想快啲拎貨呢？ヽ(●´∀`●)ﾉ