九龍城碼頭巴士插地盤 途人被撞受傷倒地

2021年4月22號朝早6點幾，九龍城碼頭公共運輸交匯處發生涉及兩架九巴嘅車禍。

根據網上流傳嘅照片，一架行走6C號路線嘅九巴富豪B9TL 12米版本雙層巴士（車隊編號：AVBWU740、車輛登記：VE6944），突然失控撞倒一名途人，再撞上一架九巴41號路線富豪B9TL 12米版本雙層巴士（車隊編號：AVBWU445、車輛登記：TV679），然後剷入現場一個地盤，並且一直衝到地盤後方行人路上面，直到撞上花槽先至停低。

期間被巴士撞倒嘅途人係準備開工嘅地盤工人，傷者倒地流血，一班地盤工作人員見狀，立即帶埋急救用品救助傷者，救護員到場證實傷者腿部骨折。

受今次車禍影響，九龍城碼頭公共運輸交匯處內嘅巴士未能離開。運輸署表示，新碼頭街往九龍城碼頭巴士總站方向全線封閉。

（0950時更新：傷者係南亞裔人士，返地盤準備開工，車禍中被巴士輾過，左小腿有「開放性傷口（open wound）」大量出血，救護員喺現場幫傷者腳部綁止血帶、盤骨落創傷矯正裝置，傷者上救護車時血壓低，最後要落埋傳明酸協助止血。估計喺現場最少無咗500~1000ml血，盤骨骨折，傷者由救護車送到急症室後X光照到盤骨移位，好大機會將來唔行得返。另外有醫護人員意見指，今次傷者嘅傷勢，依照過往案例，可以有近一半機會兩星期內離世。）