【日本】鐵膠爬欄入路軌 搞到列車要停駛

正所謂「樹大有枯枝」，作為一個坐擁龐大人數嘅嗜好，難免總有一班「問題人口」，例如香港近年都湧現一批不良巴士迷同埋不良鐵路迷，由人牆企喺行車路段到講大話扮拜山去邊境禁區車站拍攝，都令香港人喺枯燥嘅生活之中帶嚟一啲話題…

馬路人牆影巴士 點會係正常嘅事？

成個地球講緊70億人，發達地區都唔少，所以不良交通迷嘅問題當然唔係香港獨有：當地時間2021年3月24號，日本東京發生一宗人為擅闖鐵路路軌事故。

當日JR中央線一抽列車正係由立川駅開去日野駅，列車去到多摩川橋嗰陣，車長發現列車前面嘅路軌遠方有多人聚集喺路軌旁邊，更有人闖入路軌範圍。

為安全起見，列車車長即刻煞停列車，路軌上各人四處逃走，但3人因闖入路軌被趕到嘅警員扣留保護，期間列車車長嬲到喺駕駛室開窗伸個頭出嚟「教育」呢班人。

事故令中央線服務因此延誤30分鐘。目擊者指呢班走入圍欄範圍聚集嘅人為數約15人，手持相機拍攝，疑似為鐵路迷。

大家又有無聽過2020年香港一個「爬圍網入路軌範圍影東鐵」嘅傳聞呢？