香港近年由唔少商業機構會贊助市民免費乘搭天星小輪或者香港電車，喺2021年3月6號中信銀行（國際）因為要宣傳佢哋旗下一項叫「inMotion動感銀行」嘅服務，決定贊助全香港市民免費乘搭天星小輪來往尖沙咀←→中環／灣仔。
雖然成個尖沙咀天星碼頭都有大幅橫額宣傳有關嘅銀行服務，而且亦都擺出咗告示牌，標示「2021年3月6日免費乘船日」，但好多市民係去到搭船嘅嗰一刻先至知道有免費船。
由於今次銀行方面搵咗孩之寶嘅知名遊戲商標「大富翁」做推廣宣傳，所以可以喺碼頭入閘處附近見到唔少大富翁經典嘅黑衫、黑帽、白鬍鬚嘅「富翁」公仔。
未知係咪因為疫情令到香港市民少咗出街，定係因為缺乏宣傳，走訪晒3個碼頭都發覺乘客數量都係非常之少。
當中以遠離商業中心區嘅灣仔天星碼頭特別嚴峻，乘客尤其稀疏。不過天星小輪嘅職員仍然好耐心咁用本地話同英語向乘客講解「唔需要畀錢就可以搭船」。
至於喺中環碼頭方面，碼頭入閘區內等上船嘅區域，玻璃窗上面貼有透光廣告， 日頭睇落去都幾清晰醒目…不過入黑之後就好似真係睇唔清楚顯示緊啲乜。
有時候有人會問：作為一間商業機構，贊助市民免費乘搭天星小輪或者香港電車，有幾多乘客睇得到？成效有幾大？
或許重點唔係在於單純嘅一個宣傳作用，而係作為一間希望喺香港做生意嘅公司，掟嚿錢去支持香港嘅老牌形象公共交通機構，都算係一種社會責任。
1 Trackback / Pingback