2020年9月12號下晝4點幾，1架屬於萬成清潔服務有限公司嘅洗街車喺深水埗桂林街155號對開起步之後，未有煞車就直衝過「讓線」，撞落元州街1架行緊6號路線去美孚、啱啱受交通影響而停正喺十字路口嘅九巴丹尼士三叉㦸E500 Turbo型12版本冷氣雙層巴士（車隊編號：ATENU864，車輛登記：TW5158）。
根據網絡上流傳嘅影片可以見到，當時巴士上面載有唔少乘客，車禍後有巴士乘客氣憤難平，企起身指責洗街車司機。
根據另一段網絡上流傳嘅影片，見到車禍後巴士上有乘客受傷倒地。
車禍發生後，警方迅速調派大量機動部隊警員到場，封鎖附近街道，除咗喺封鎖線範圍以內居住或營商嘅市民之外，全部都唔能夠進入車禍現場附近範圍。
涉及今次車禍嘅雙層巴士，右側中段嘅下層玻璃窗粉碎，車身金屬板凹陷。
或許可以話不幸中之大幸就係，當時呢架九巴雙層巴士停正喺路口阻擋咗洗街車， 雖然好不幸咁令到巴士上面多名乘客受傷，但同一時間亦因為呢一架雙層巴士事發時停喺路口，避免咗洗街車直衝入去桂林街市集。
由於今次涉及傷者數目眾多，消防處列作「大量傷者事故（Mass Casualty Incident）」，迅速調派多架救護車同埋救援車輛，包括1架流動傷者治療車、1架輔助醫療裝備車，並且出動「特別支援隊」、「事故安全隊」。
今次車禍之中總共有24人受傷，包括巴士上面10男13女乘客以及洗街車上1名女乘客，年齡介乎5至85歲，分別送去明愛醫院以及瑪嘉烈醫院救治。
幸好傷者當中22人只係手腳受輕傷，可以自行行上救護車，只有洗街車上面嘅女乘客同另一名巴士上嘅女乘客需要用擔架同頸箍固定、由救護員抬上救護車。
根據1名當時乘搭涉事九巴雙層巴士、坐喺上層前排嘅姓李男乘客所講，事發時九巴雙層巴士喺現場停低咗，然後好快就被洗街車攔腰撞埋去，巴士車身猛烈搖動，巴士車廂入面頓時一片混亂。
根據呢位姓李嘅男乘客所講，巴士被洗街車撞擊嘅時候，佢頭部撼咗落去巴士車廂嘅玻璃，不過好彩就無明顯傷痕。佢身為一位曾經駐守喺旺角消防局、已經退咗休27年嘅消防員，佢自認識得急救，自己評估過自己嘅傷勢輕微，然後就好快嘗試協助其他乘客。佢拎到冷敷料簡單處理自己頭部之後，面對記者時仲識得話「嗰度有幾個（消防員）我睇住佢哋『入班』」。
車禍發生後，警方封鎖元州街介乎南昌街同欽州街之間一段，現場警員協助被困嘅車輛離開，不過因為雙層公共巴士體型龐大，佢哋就無咁好彩，要留喺現場等解封。
因為受到今次車禍同封路影響，九巴多條原本行經事發元州街路段嘅巴士路線需要改道，經由南昌街、汝州街、欽州街返回原有路線。
事發路段去到夜晚大約9點解封。
西九龍總區交通意外調查組總督察林知行表示，警方已經拘捕64歲洗街車司機，涉嫌「危險駕駛」，並指警方將循路面狀況、車輛機件性能、車輛有否超重、司機駕駛態度等作調查。
九巴向傳媒表示對意外非常關注，已立即派職員到現場支援，並趕去醫院慰問傷者，提供適切協助，亦感謝現場搶救嘅消防同埋救護人員，並會配合警方調查意外。
最後，本台僅此慰問今次車禍之中各位傷者，並希望大家盡快痊癒。
Be the first to comment