上星期970車長「藏有攻擊性武器」事件，當事人被控「老不」，係咪地球上最無紀律嘅所謂紀律部門跌落地嗱返咋沙暫且唔評論(亦唔响呢度評論)。一個星期過去，除咗永遠企响工人階級對面嘅匪賊會話「睇少林足球上腦」、專出人渣政客嘅拔萃男書院嘅畢業生話「可以徒手」呢啲亂膠咁噏之外，最多人講嘅係「改用電鏡咪得囉」
普遍對汽車無乜認識嘅人，可能未必知呢個世界係有電動調校睹後鏡；又或者唔少成日認為「巴士佬轉彎霸兩條線正仆街」嘅嗰啲「2B1A-L」，可能以為只有私家車先至有「電鏡」。事實係，巴士用電動睹後鏡已經係出現咗廿幾卅年嘅「高科技」。
最早用電動調校睹後鏡嘅巴士製造商應該係德國 Neoplan，或是 Setra (太遠古，考究唔到) 响1990年代推出嘅旅遊巴車款。至於香港，最早出現電鏡嘅係2002年嘅 Scania K113 Irizar Century，即係俗稱「西雞」嘅旅遊巴士，之後就有 Berhkof Axial，再跟住嘅就有廈門金龍、鄭州宇通等「愛祖国用国貨」。香港嘅車身廠亦陸續有採用。
講嚟講去都係旅遊巴，咁一般嘅巴士呢？遠在歐洲，早就新車 100%係電鏡。新加坡早年亦開始採用電鏡。
「新加坡用嘅車款同香港一樣，咁即係香港都可以用得啦」道理上無錯嘅，但要知道，目前本港巴士公司採用嘅普通睹後鏡，每一套嘅成本不過幾百蚊，「電鏡」呢……
歐洲最大睹後鏡生產商 Mekra Lang，一套符合歐盟法規標準嘅「電鏡」索價都係幾百蚊，不過個符號係「€」而唔係港幣，實際數字其實接近四個位，記住係 Euro，唔係港紙，OK?!
Mekra Lang 响中国有合資工廠，都唔平得幾多。相信唔少人都會諗到「世界工廠」乜都造得出，甚至一如 Jack Deer 所云「假貨勁過真貨」。事實上，亦真係好多選擇，但講緊每一套索價，最便宜嘅，都逾 HK$1,500。
但其實唔係未必無兩全其美嘅方法，巴士公司有試用緊一款價格應該相對低廉嘅電動鏡，但據聞好似只係得左邊係電動調校。
不過咁，無論手動或電動，仲有安裝工序上去先至用得。手動鏡就咁鑽窿上鏍絲搞掂，電鏡仲要拉電線。唔止安裝人工成本貴咗，當如果唔好彩 BOOM 嘅時候，維修費 / 對方賠償金額 亦因應提高。
以我自己嘅經驗而言，電鏡的確方便好多。而且不論邊個製造商嘅出品，仲可能可以追加 option 除霞發熱線，冬天或落雨天少咗一重擔心。不過香港人嘅心態都係「鹹魚」── 巴士公司要買啲好嘢係你嘅事，唔好要我俾多一個仙。
Be the first to comment