珀、愉船荒仍未止 叫乘客改搭巴士

因為新型冠狀病毒（武漢肺炎），香港境內唔同高速船隊都面臨經營困境：一啲重要後備零件無法如期付運，令到雙體船唔可以跟時間表「上排」檢查維修。

近日有讀者反映，珀麗灣客運有限公司「間中」因為旗下船隻故障，需要臨時將部份高速船班次改為巴士。

根據2020年8月4號嘅情況，當日因應有船隻引擎故障，來往珀麗灣碼頭←→荃灣碼頭嘅全數高速船班次需要改為居民巴士服務，接載乘客來往珀麗灣巴士總站←→荃灣碼頭。

根據探子回報，荃灣上巴士嘅位置就被好多的士阻擋，不過職員安排幾好，而且唔收費。

至於另一個都有用高速船嘅社區――愉景灣，較早前本台都報道過愉景灣交通服務有限公司「船荒」之初一度租過新渡輪…

新渡輪拓展版圖？ 愉景灣租船嚟用！

之後愉景灣交通服務有限公司再改為租用港九小輪…

愉景灣「船荒」未止 出入續靠外援馳

本台之後接到「魚旦灣 A380 機頭佬 😆」再報料，愉景灣交通服務有限公司「船荒」問題仍然「未解決」…

愉景灣居民坐渡輪出市區，繼續係「畀愉景灣船價錢搭港九小輪」（＝＿＝）

不過，「屋漏兼逢連夜雨」，由於新型冠狀病毒（武漢肺炎）持續擴散，往來愉景灣←→中環嘅渡輪乘客量持續下跌。因此，愉景灣航運服務有限公司喺2020年7月24號致函運輸署，並喺7月29號獲運輸署回覆指「唔反對」由7月30號開始實施臨時「縮班」措施，先以8月7號為限，但可按照實際情況延長。「臨時班次表」如下：

星期一至五非公眾假期朝早繁忙時間（0630~0910）開往中環班次由11班減到8班：

• 0630
• 0700
• 0720
• 0740
• 0800
• 0820
• 0840
• 0910

星期六朝早（0815~0845）開往中環班次由3班合併為2班：

• 0820
• 0840

星期一至五非公眾假期下晝（1530、1550）開往愉景灣班次由2班合併為1班：

• 1540

另一方面，由2020年8月10號開始，每日0030~0420由愉景灣開往中環、0100~0500由中環開往愉景灣嘅各開4班通宵渡輪，臨時全部改為每邊各開2班通宵居民巴士。行車路線同埋巴士站如下：

愉景灣→中環3號渡輪碼頭（0100、0300）

愉景灣道→愉景灣道有蓋行車通道→海澄湖畔路→愉景灣道有蓋行車通道→愉景灣隧道→愉景灣隧道連接路→翔東路→欣澳道→迴旋處→竹篙灣公路→北大嶼山公路→青嶼幹線→汲水門橋→青馬大橋→長青公路→青沙公路→南灣隧道→昂船洲大橋→青沙公路→西九龍公路→西區海底隧道→干諾道西→干諾道中→民光街

上客點

• 愉景廣場巴士總站
• 愉景灣道海燕徑第15座對面
• 愉景灣道愉景灣國際學校對面
• 愉景灣道翠山閣外
• 愉景灣道時峰外
• 愉景北商場近斜面升降機
• 愉景灣道尚堤公共運輸交匯處
• 愉景灣隧道行政大樓對面

落客點

• 干諾道西港澳碼頭巴士總站外
• 民光街中環3號碼頭外

中環3號渡輪碼頭→愉景灣（0200、0400）

民光街→民耀街→港景街→干諾道中東行→干諾道中西行→干諾道西→西區海底隧道→西九龍公路→青沙公路→昂船洲大橋→南灣隧道→青沙公路→長青公路→青馬大橋→汲水門橋→青嶼幹線→北大嶼山公路→竹篙灣公路→迴旋處→欣澳道→翔東路→愉景灣隧道連接路→愉景灣隧道→愉景灣道有蓋行車通道→海澄湖畔路→愉景灣道有蓋行車通道→愉景灣道

上客點

• 民光街中環3號碼頭外
• 干諾道中香港中華總商會外

落客點

• 愉景灣隧道行政大樓外
• 愉景北商場近斜面升降機
• 愉景灣道安澄閣外
• 愉景灣道時峰對面
• 愉景灣道峻山閣對面
• 愉景灣道明翠台外
• 愉景灣道海燕徑第15座外
• 愉景廣場巴士總站

收費方面，用已登記八達通卡畀錢就係成人38蚊、12歲以下小童19蚊，用無登記八達通卡或者現金就係成人52蚊、12歲以下小童26蚊，65歲或以上長者使用八達通卡嘅2蚊搭車優惠同樣適用。

愉景灣出新巴士 通告指全車歐製

究竟嗰2架「歐洲製造」嘅全新猛獅歐盟6型雙層巴士係咪會掟去行通宵線呢？過幾日大家不妨去睇睇 (^ _ ^)