新型冠狀病毒（武漢肺炎）喺2020年肆虐全球，世界各地都頒佈咗旅遊禁令，香港作為一個國際知名旅遊城市，一直有唔少人從事旅遊相關行業，喺今次全球疫情之中大受打擊。
香港旅遊發展局主席彭耀佳喺5月2號朝早嘅香港電台公共事務組節目《香港家書》之中曾經講到：「既然旅客回來需時，香港人亦暫時無法外遊，那何不香港人做自己的旅客？以我自己為例，我雖然是土生土長，但也是聽旅發局同事所講，才知道香港有多個媲美『天空之鏡』的打卡靚景，細小的地方也有港版千島湖。所以，我們希望鼓勵港人在疫情過後，不妨根據建議的特色路綫、旅遊貼士，重新探索社區文化特色，感受一下久違的旅遊樂趣。」
現年65歲嘅「鴨靈號」作為香港現存最後一艘正宗中式帆船，機緣巧合之下得到現有嘅船主由海底打撈返上嚟，從一片殘骸之中重新復修，務求喺香港做一個帶有文化深度嘅旅遊項目。
喺過去嘅呢個月入面，面對全球疫情打擊旅遊業，「鴨靈號」都面臨挑戰――原本靠西方遊客為主嘅呢一類文化深度旅遊，一下子就被全球嘅旅遊禁令搞到無辦法繼續落去。
但係承載著過去漁民不畏風雨嗰一種堅毅不屈精神嘅「鴨靈號」，稍作整頓之後已經尋找到新嘅旅遊業務方向――進一步向香港本地居民推廣香港本地嘅文化歷史！
由2020年5月2號開始，「鴨靈號」就重新出發，為香港人帶來香港本地文化深度教育遊…（● v ●）
如果想認真咁樣去認識一下漁民生活嘅細節，可以參加「鴨靈號」逢星期六、日及公眾假期，由筲箕灣避風塘出發嘅「文化體驗遊」，成人收費170蚊。
如果只係想簡單啲試吓搭帆船遊維港認識多啲兩岸嘅話，「鴨靈號」喺週末都會提供「維港遊」：
成人收費視乎航線同時段，單程計50到80蚊，欣賞埋幻彩詠香江嘅嗰程都只係100蚊。
因應香港政府嘅防疫政策，「鴨靈號」既加強清潔，亦減低每團承載嘅乘客數量。至於有人或者會擔心搞旅行團可能會違反所謂嘅599G「限聚令」，其實「鴨靈號」現時持有嘅係渡輪牌照，屬於公共交通工具，係可以獲得豁免。
2020年5月2號有幸參觀咗「鴨靈號」呢個新「維港遊」嘅第一團，由尖沙咀海濱開去九龍城碼頭單程船程只係20幾分鐘，如果計由尖沙咀去九龍城碼頭呢一帶，應該點都快過搭道路集體公共交通工具――計落又都應該平過搭的士――空氣同風景都靚過搭道路公共交通工具。
而重點係：過程中仲會聽到有關維港岸邊區域嘅一啲簡介。
意想唔到嘅係，當「鴨靈號」去到九龍城碼頭嘅時候就已經有一對中年男女一齊walk-in上船，佢哋話見已經好多日無出街，原本諗住去到九龍城碼頭試下體驗搭渡輪過海，緣份安排之下撞啱鴨靈號埋岸，咁就做咗呢個新團入面第一批walk-in嘅客。
問到佢哋點樣睇呢一種維港遊，佢哋好簡單直接咁講：「幾十蚊唔係貴，人一世物一世，點解唔制？」
「鴨靈號」返到去尖沙咀海濱嘅時候，唔少市民都攞起手機拍攝，而且已經有最少6名乘客等緊上船，或者就如「鴨靈號」嘅代表所講：「與其大家一窩蜂塞入去西貢，不如試吓用另一個方式去欣賞我哋嘅維港。」
Be the first to comment